(អាប៊ូដាប៊ី)៖ អាជ្ញាធរក្នុងទីក្រុងអាប៊ូដាប៊ី (Abu Dhabi) នៃប្រទេសអេមីរ៉ាតអារ៉ាប់រួម នៅថ្ងៃអាទិត្យ បានអន្តរាគមន៍ពន្លត់អគ្គិភ័យដែលបង្កឡើងដោយការវាយប្រហារពីយន្តហោះដ្រូនទៅលើម៉ាស៊ីនភ្លើងមួយកន្លែង ដែលស្ថិតនៅក្រៅបរិវេណផ្ទៃក្នុងនៃរោងចក្រថាមពលនុយក្លេអ៊ែរ Barakah ក្នុងតំបន់ Al Dhafra។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

យោងតាមការិយាល័យព័ត៌មានអាប៊ូដាប៊ី ហេតុការណ៍នេះមិនបានបណ្តាលឱ្យមានអ្នករងរបួសនោះទេ ហើយកម្រិតសុវត្ថិភាពវិទ្យុសកម្មក៏មិនមានការរងផលប៉ះពាល់អ្វីឡើយ។ ទន្ទឹមនឹងនេះ អាជ្ញាធរសហព័ន្ធសម្រាប់បទប្បញ្ញត្តិនុយក្លេអ៊ែរ ក៏បានបញ្ជាក់អះអាងផងដែរថា ប្រព័ន្ធប្រតិបត្តិការសំខាន់ៗរបស់រោងចក្រនៅតែបន្តដំណើរការជាធម្មតា។

ទោះបីជាសេចក្តីថ្លែងការណ៍មិនបានបញ្ជាក់ថាតើនរណាជាអ្នកនៅពីក្រោយការវាយប្រហារនេះក៏ដោយ ប៉ុន្តែគួររំលឹកថា ប្រទេសអេមីរ៉ាតអារ៉ាប់រួម (UAE) ធ្លាប់បានរងការវាយប្រហារដោយមីស៊ីល និងដ្រូនជាច្រើនលើកច្រើនសាររួចមកហើយ ក្នុងអំឡុងពេលជម្លោះរវាង អ៊ីស្រាអែល-អាមេរិក និងអ៊ីរ៉ង់ ដោយអាជ្ញាធរធ្លាប់បានអះអាងថា គោលដៅវាយប្រហារលើហេដ្ឋារចនាសម្ព័ន្ធថាមពល និងនាវាចរណ៍ទាំងនោះ គឺមានប្រភពចេញពីប្រទេសអ៊ីរ៉ង់៕