(ហ្ស៊េរុយសាឡឹម)៖ គណៈរដ្ឋមន្ត្រីអ៊ីស្រាអែលនៅថ្ងៃអាទិត្យ បានអនុម័តផែនការសាងសង់បរិវេណការពារជាតិ នៅលើទីតាំងដែលធ្លាប់ជាទីស្នាក់ការរបស់ទីភ្នាក់ងារសង្គ្រោះ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) ក្នុងតំបន់ហ្ស៊េរុយសាឡឹមខាងកើត ដែលត្រូវបានអ៊ីស្រាអែលកម្ទេចចោលកាលពីពេលថ្មីៗនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កាលពីខែមករាកន្លងទៅ អ៊ីស្រាអែលបានឈូសឆាយអគារនានានៅក្នុងបរិវេណទីភ្នាក់ងារ ​UN មួយនេះ បន្ទាប់ពីបានរឹបអូសយកទីតាំងនេះកាលពីឆ្នាំមុន ដែលជាទង្វើត្រូវបាន UNRWA ថ្កោលទោសថាជាការរំលោភច្បាប់អន្តរជាតិ។ យោងតាមសេចក្តីថ្លែងការណ៍រួមរវាងក្រសួងការពារជាតិ និងសាលាក្រុងហ្ស៊េរុយសាឡឹម បរិវេណថ្មីនេះនឹងរួមបញ្ចូលទាំងសារមន្ទីរយោធា ការិយាល័យជ្រើសរើសកងទ័ព និងការិយាល័យរបស់រដ្ឋមន្ត្រីការពារជាតិ។

រដ្ឋមន្ត្រីការពារជាតិអ៊ីស្រាអែល លោក អ៊ីស្រាអែល កាត (Israel Katz) បានហៅការសម្រេចចិត្តនេះថាជាការបង្ហាញពី «អធិបតេយ្យភាព លទ្ធិស៊ីយ៉ូនីស និងសន្តិសុខ»។ លោកបានសង្កត់ធ្ងន់ថា គ្មានអ្វីដែលត្រឹមត្រូវជាងការសាងសង់ស្ថាប័នយោធា នៅលើគំនរបាក់បែកនៃទីស្នាក់ការ UNRWA នោះទេ ដោយលោកចោទប្រកាន់ថាបុគ្គលិករបស់ទីភ្នាក់ងារនេះបានចូលរួមជាមួយក្រុមភេរវករហាម៉ាស ក្នុងការសម្លាប់រង្គាលលើជនជាតិអ៊ីស្រាអែល កាលពីថ្ងៃទី០៧ ខែតុលា ឆ្នាំ២០២៣។

គួរបញ្ជាក់ថា ជុំវិញការចោទប្រកាន់នេះ ថ្វីត្បិតតែ UNRWA បានបញ្ឈប់បុគ្គលិកមួយចំនួនក្តី ប៉ុន្តែទីភ្នាក់ងារនេះបានបញ្ជាក់ថា អ៊ីស្រាអែលមិនបានផ្តល់ភស្តុតាងគ្រប់គ្រាន់ឡើយ ខណៈអតីតប្រធានទីភ្នាក់ងារនេះបានចោទប្រកាន់អ៊ីស្រាអែលវិញថា កំពុងធ្វើយុទ្ធនាការផ្សព្វផ្សាយព័ត៌មានមិនពិត៕