(វ៉ាស៊ីនតោន)៖ សារព័ត៌មាន Axios នៅថ្ងៃអាទិត្យ បានរាយការណ៍ដោយផ្អែកលើព័ត៌មានចារកម្មសម្ងាត់ថា ប្រទេសគុយបាបានទទួលយន្តហោះដ្រូនយោធាជាង ៣០០គ្រឿង ហើយថ្មីៗនេះបានចាប់ផ្តើមពិភាក្សាពីផែនការប្រើប្រាស់ពួកវា ដើម្បីវាយប្រហារលើមូលដ្ឋានទ័ពសហរដ្ឋអាមេរិកនៅឈូងសមុទ្រក្វាន់តាណាម៉ូ (Guantanamo Bay) នាវាចម្បាំងអាមេរិក និងអាចឈានដល់ការវាយប្រហារទីក្រុង Key West ក្នុងរដ្ឋផ្លរីដា (Florida) ទៀតផង។

យោងតាមមន្ត្រីជាន់ខ្ពស់អាមេរិកមួយរូបបានបង្ហើបថា ព័ត៌មានសម្ងាត់នេះអាចនឹងក្លាយជាលេសមួយសម្រាប់សហរដ្ឋអាមេរិក ក្នុងការចាត់វិធានការយោធាប្រឆាំងនឹងប្រទេសគុយបា។ របាយការណ៍នេះបានបង្ហាញយ៉ាងច្បាស់ថា រដ្ឋបាលរបស់លោកប្រធានាធិបតី ដូណាល់ ត្រាំ កំពុងចាត់ទុកគុយបាថាជាការគំរាមកំហែងដ៏ធំមួយ ដោយសារតែការវិវឌ្ឍនៃសមត្ថភាពសង្គ្រាមដ្រូន និងវត្តមានរបស់ទីប្រឹក្សាយោធាអ៊ីរ៉ង់នៅក្នុងរដ្ឋធានីឡាហាវ៉ាន៕