(តៃប៉ិ)៖ កាលពីថ្ងៃអាទិត្យ ទី១៧ ខែឧសភា ឆ្នាំ២០២៦ មេដឹកនាំកោះតៃវ៉ាន់ លោក Lai Ching-te បានបង្ហោះសារថា តៃវ៉ាន់នឹងមិនក្លាយជាកូនអុកឱ្យគេពលីឬដោះដូរឡើយ ហើយនឹងមិនបោះបង់ចោលសេរីភាពនៃការរស់នៅរបស់ខ្លួន ក្រោមសម្ពាធដាច់ខាត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ការអត្ថាធិប្បាយរបស់លោក Lai គឺជាការឆ្លើយតបដោយផ្ទាល់លើកដំបូងរបស់លោក ចំពោះកិច្ចប្រជុំកំពូលកាលពីសប្តាហ៍មុន​នៅឯទីក្រុងប៉េកាំង រវាងប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៉ី ជីនពីង ដែលបានធ្វើឱ្យកើនឡើងក្តីបារម្ភនៅតៃវ៉ាន់ ស្តីពីការគាំទ្ររបស់សហរដ្ឋអាមេរិក ចំពោះដែនកោះនេះ។

ក្រោយជួបលោក ស៉ី លោក ត្រាំ បានអះអាងថា រូបលោកមិនបានផ្តល់ការប្តេជ្ញាណាមួយនោះទេ ចំពោះលោកប្រធានាធិបតីចិន ពាក់ព័ន្ធនឹង​តៃវ៉ាន់ ប៉ុន្តែបានបន្ថែមថា រូបលោកកំពុងពិចារណានៅឡើយ ថាតើគួរផ្តល់ការយល់ព្រមចំពោះកញ្ចប់លក់សព្វាវុធថ្មីសម្រាប់តៃវ៉ាន់ដែរឬយ៉ាងណា ហើយលោក ត្រាំ បានបន្តថា ទីក្រុងវ៉ាស៉ីនតោនមិនចង់ឱ្យមាននរណាម្នាក់ស្រាប់តែនិយាយថា តោះពួកយើងប្រកាសឯករាជ្យ ដោយសារ​យើងមានអាមេរិកគាំទ្រនោះទេ។

លោក Lai Ching-te បាននិយាយថា តៃវ៉ាន់នឹងមិនដុតបញ្ឆេះឬបង្កើនជម្លោះឡើយ ប៉ុន្តែនឹងមិនបោះបង់ចោលអធិបតេយ្យ ក៏ដូចជាសេក្តីថ្លៃថ្នូរ ឬមួយក៏ការរស់នៅដោយសេរី និងប្រជាធិបតេយ្យរបស់ខ្លួនឡើយ ហើយលោកបានអះអាងថា ចិនគឺជាប្រភព​នៃបញ្ហាអស្ថិរភាពក្នុងតំបន់។ លោក Lai បានបន្តថា តៃវ៉ាន់នឹងមិនក្លាយជារបស់ឱ្យគេពលីឬដោះដូរដាច់ខាត។

ជាចុងក្រោយ មេដឹកនាំតៃវ៉ាន់រូបនេះ បានគូសបញ្ជាក់ថា កិច្ចសហប្រតិបត្តិការសន្តិសុខរយៈពេលវែង និងការលក់សព្វាវុធ រវាងតៃវ៉ាន់និងអាមេរិក គឺជាផ្អែកលើច្បាប់របស់អាមេរិក តាំងពីឆ្នាំ១៩៧៩ ដែលតម្រូវឱ្យទីក្រុងវ៉ាស៉ីនតោន ផ្តល់មធ្យោបាយការពារជាតិ ដល់ដែនកោះនេះ។ លោក Lai បានសង្កត់ធ្ងន់ថា វាមិនត្រឹមជាការប្តេជ្ញាសន្តិសុខរបស់អាមេរិក​ចំពោះតៃវ៉ាន់ប៉ុណ្ណោះទេ ប៉ុន្តែក៏ជាកម្លាំងទប់ស្កាត់ដ៏សំខាន់បំផុតមួយផងដែ រអស់រយៈពេលជាច្រើនឆ្នាំមកនេះ ប្រឆាំងសកម្មភាពដែលបំផ្លិចបំផ្លាញសុខសន្តិភាពនិងស្ថិរភាពក្នុងតំបន់។

គួរបញ្ជាក់ថា ស្របពេលដែលរដ្ឋបាលលោក ត្រាំ កាលពីខែធ្នូ ចុងឆ្នាំ២០២៥ បានអនុម័តកញ្ចប់លក់សព្វាវុធរហូតដល់​១១ពាន់លានដុល្លារ ដែលជាទំហំធំបំផុតសម្រាប់តៃវ៉ាន់ ទីភ្នាក់ងារព័ត៌មាន Reuters បានរាយការណ៍ថា កញ្ចប់សព្វាវុធទី២ មានតម្លៃដល់ទៅ ១៤ពាន់លានដុល្លារ កំពុងបន្តរង់ចាំការផ្តល់ភ្លើងបៃតងពីរូបលោក នៅឡើយ៕