(វ៉ាស៉ីនតោន)៖ កាលពីថ្ងៃអាទិត្យ ទី១៧ ខែឧសភា ឆ្នាំ២០២៦ សេតវិមាន បានប្រកាសថា ចិនបានសន្យាទិញផលិតផលកសិកម្មរបស់​សហរដ្ឋអាមេរិក យ៉ាងហោច១៧ពាន់លានដុល្លារ សម្រាប់ឆ្នាំ២០២៦ ២០២៧ និង២០២៨។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

សេតវិមាន បាននិយាយថា តួលេខ១៧ពាន់លានដុល្លារខាងលើ គឺមិនរាប់បញ្ចូលការប្តេជ្ញាទិញសណ្តែកសៀង ដែលចិនបានសន្យា កាលពីខែតុលា ឆ្នាំ២០២៥។ តាមទិន្នន័យក្រសួងកសិកម្មអាមេរិក ការនាំចេញផលិតផលកសិកម្មរបស់អាមេរិកទៅកាន់ប្រទេសចិន បានថយចុះយ៉ាងកត់សម្គាល់ ក្រោយការដំឡើងពន្ធសងសឹកគ្នាទៅមកកាលពីឆ្នាំមុន បានរឹតត្បិតជាខ្លាំងលើការធ្វើពាណិជ្ជកម្ម ដែលបានធ្លាក់ចុះ៦៥ភាគរយ មកនៅត្រឹម៨,៤ពាន់លានដុល្លារ ក្នុងឆ្នាំ២០២៥។

គួរបញ្ជាក់ថា ចិនបានកាត់បន្ថយយ៉ាងគំហុកនូវការពឹងផ្អែកលើផលិតផលកសិកម្មរបស់សហរដ្ឋអាមេរិក ចាប់តាំងពីអាណត្តិទី១​របស់លោក ត្រាំ ដោយបាននាំចូលប្រហែល២០ភាគរយ នៃសណ្តែកសៀងសរុបរបស់ខ្លួនពីអាមេរិក នៅឆ្នាំ២០២៤ ជាឆ្នាំមុនពេល​លោកត្រឡប់មកកាន់អំណាចអាណត្តិទី២។ ដោយឡែក កាលពីឆ្នាំ២០១៦ សណ្តែកសៀងដែលចិននាំចូលពីអាមេរិក គឺ៤១ភាគរយ។ បើតាមសេតវិមាន ចិននឹងធ្វើការជាមួយនិយ័តករអាមេរិក ដើម្បីលុបចោលការផ្អាកសិទ្ធិនាំចេញសម្រាប់​រោងចក្រសាច់គោអាមេរិក និងបន្តឡើងវិញការនាំចូលផលិតផលបសុបក្សីពីបណ្តារដ្ឋនៅអាមេរិក ដែលត្រូវបានកំណត់ថា គ្មានជំងឺផ្តាសាយបក្សី៕