(ហ៊្សេរុយសាឡិម)៖ កាលពីថ្ងៃអាទិត្យ ទី១៧ ខែឧសភា ឆ្នាំ២០២៦ នាយករដ្ឋមន្រ្តីអ៉ីស្រាអែល លោក Benjamin Netanyahu បាននិយាយថា អ៉ីស្រាអែលជិតសម្រេចគោលដៅដ៏សំខាន់មួយនៃសង្រ្គាមនៅហ្កាហ្សាហើយ នោះគឺការសម្លាប់ជនទាំងឡាយដែល​ជាអ្នកទទួលខុសត្រូវរៀបចំការវាយប្រហារដ៏ភ្ញាក់ផ្អើល កាលពីថ្ងៃទី៧ ខែតុលា ឆ្នាំ២០២៣ លើប្រទេសអ៉ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ការអត្ថាធិប្បាយរបស់លោក Netanyahu គឺបន្ទាប់ពីយោធាអ៉ីស្រាអែល បានប្រកាសថា មេដឹកនាំយោធារបស់ក្រុមហាម៉ាសប៉ាឡេស្ទីន លោក Ezzedine Al-Haddad ត្រូវបានសម្លាប់ក្នុងការវាយប្រហារតាមផ្លូវអាកាស កាលពីថ្ងៃសុក្រ។ លោក Netanyahu បាននិយាយដូច្នេះថា «ខ្ញុំធ្លាប់បានសន្យាហើយថា ស្ថាបនិកទាំងអស់ នៃអំពើសម្លាប់រង្គាលនិងចាប់ចំណាប់ខ្មាំងនោះ នឹងត្រូវសម្លាប់ចោលម្តងមួយៗរហូតដល់អ្នកចុងក្រោយ ហើយពួកយើងកាន់តែជិតសម្រេចបេសកកម្មនេះមែនទែនហើយ»។

ក្រោយព្រឹត្តិការណ៍ការវាយប្រហារថ្ងៃទី៧ ខែតុលា ឆ្នាំ២០២៣ ដែលបានផ្តាច់ជីវិតមនុស្សសរុបខ្ទង់១២០០នាក់ អ៉ីស្រាអែលបានធ្វើសង្រ្គាមយ៉ាងសាហាវនៅហ្កាហ្សា និងសម្លាប់ថ្នាក់ដឹកនាំក៏ដូចជាមេបញ្ជាការជាច្រើនរូប របស់ក្រុមហាម៉ាស ក្នុងនោះរួមមានទាំងមេដឹកនាំនយោបាយ លោក Ismail Haniyeh, លោក Yahya Sinwar ដែលត្រូវបានចាត់ទុកជា​មេខ្លោងធំ នៅពីក្រោយការវាយប្រហារ៧ តុលា និងលោក Mohammed Deif ដែលជាមេបញ្ជាការយូរឆ្នាំនៃអង្គភាពយោធារបស់ហាម៉ាស និងជាស្ថាបនិកសំខាន់ម្នាក់ទៀត។

គួរបញ្ជាក់ថា សង្រ្គាមសងសឹករបស់អ៉ីស្រាអែលនៅតំបន់ហ្កាហ្សា បានផ្តាច់ជីវិតមនុស្សសរុបជាង ៧២​ ៧៦០នាក់។ ទោះបីមានបទឈប់បាញ់ តាំងពីខែតុលា ឆ្នាំមុនក៏ដោយ អំពើហិង្សានៅតែកើតមានសឹងរាល់ថ្ងៃនៅហ្កាហ្សា ស្របពេលដែលការវាយប្រហាររបស់អ៉ីស្រាអែលនៅតែបន្ត ដោយហាម៉ាស និង​យោធាអ៉ីស្រាអែលចោទគ្នាទៅវិញទៅមក អំពីការបំពានបទឈប់បាញ់នោះ។ យោងតាមក្រសួងសុខាភិបាលហ្កាហ្សា គិតចាប់តាំងពីមានបទឈប់បាញ់ ជនជាតិប៉ាឡេស្ទីនយ៉ាងហោច៨៧១នាក់ ត្រូវបានសម្លាប់ ខណៈយោធាអ៉ីស្រាអែល បានអះអាងថា ទាហានខ្លួន៥នាក់ បានស្លាប់នៅហ្កាហ្សា៕