(កដ្ឋមណ្ឌូ)៖ អ្នកនាំផ្លូវឡើងភ្នំជនជាតិនេប៉ាល់ល្បីឈ្មោះម្នាក់ បានឡើងដល់កំពូលភ្នំខ្ពស់ជាងគេលើពិភពលោក គឺភ្នំ Everest ជាលើកទី៣២ កាលពីថ្ងៃអាទិត្យ ទី១៧ ខែឧសភា ឆ្នាំ២០២៦ ខណៈវាគឺជាការបំបែកកំណត់ត្រាចាស់របស់អ្នកនាំផ្លូវម្នាក់នោះផ្ទាល់ កាលពីឆ្នាំមុន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Kami Rita អាយុ៥៦ឆ្នាំ បានឡើងដល់កំពូលភ្នំកម្ពស់៨៨៤៨ម៉ែត្រជាថ្មីម្តងទៀត នៅពេលលោកត្រូវនាំផ្លូវក្រុមភ្ញៀវអ្នកឡើងភ្នំ។ ក្រសួងទេសចរណ៍នៃប្រទេសនេប៉ាល់ បានចូលរួមអបអរសាទររូបលោក សម្រាប់ការសម្រេចបានជោគជ័យអស្ចារ្យនេះ និងសម្រាប់​ការចូលរួមចំណែករបស់លោក ក្នុងការលើកកម្ពស់វិស័យទេសចរណ៍ឡើងភ្នំ។

លោក Kami Rita កើតនៅក្នុងភូមិតែមួយជាមួយអ្នកនាំផ្លូវឡើងភ្នំល្បីឈ្មោះម្នាក់ទៀត ឈ្មោះ Tenzing Norgay។ លោក Norgay និងជនជាតិនូវែលសេឡង់ លោក Edmund Hillary គឺត្រូវបានចាត់ទុកជាបុគ្គលដំបូងគេបង្អស់ ដែលបានឡើងដល់​កំពូលភ្នំ Everest កាលពីឆ្នាំ១៩៥៣។ ចាប់តាំងពីពេលនោះមក មានមនុស្សសរុបច្រើនជាង៨០០០នាក់ហើយ ដែលបានឡើង​ដល់កំពូលភ្នំខ្ពស់បំផុតនេះ ហើយជាច្រើននាក់ មិនមែនឡើងបានត្រឹមតែ១ដងនោះទេ។

លោក Kami Rita បានឡើងដល់កំពូលភ្នំ Everest ជាលើកដំបូង កាលពីឆ្នាំ១៩៩៤ និងបានធ្វើដូចគ្នាជារៀងរាល់ឆ្នាំ លើកលែងតែក្នុងឆ្នាំ២០១៤ ២០១៥ និងឆ្នាំ២០២០ នៅពេលការធ្វើដំណើរឡើងភ្នំ Everest ត្រូវបានបិទជាបណ្តោះអាសន្ន សម្រាប់ហេតុផលផ្សេងៗពីគ្នា។ នៅឆ្នាំខ្លះ លោកបានឡើងដល់កំពូលភ្នំដល់ទៅ២លើក។

គួរបញ្ជាក់ថា អ្នកនាំផ្លូវឡើងភ្នំ Everest ជាទូទៅ គឺជាក្រុមជនជាតិភាគតិចរស់នៅតាមបណ្តោយជួរភ្នំហិម៉ាល័យ គេហៅថា Sherpa។ ពួកគេត្រូវបានពិភពលោកទទួលស្គាល់ថា ជាអ្នកឡើងភ្នំយ់ាងស្ទាត់ជំនាញបំផុត។ សម្រាប់ឆ្នាំនេះ អាជ្ញាធរបានចេញបណ្ណអនុញ្ញាតសរុបចំនួន៤៩២ សម្រាប់អ្នកចង់ឡើងភ្នំ Everest អំឡុងរដូវកាលឡើងភ្នំខែមីនា ដល់ខែឧសភា ខណៈអ្នកឡើងភ្នំជនជាតិនេប៉ាល់ ៣នាក់បានស្លាប់នៅលើភ្នំ ក្នុងខែនេះ៕