(វ៉ាស៉ីនតោន)៖ តម្លៃប្រេងម៉ាស៊ូតដែលកើនឡើងខ្ពស់ ចាប់តាំងពីមានសង្គ្រាមអ៉ីរ៉ង់ កំពុងធ្វើឱ្យកញ្ចប់ថវិកាសាលារៀន នៅតាមស្រុករបស់សហរដ្ឋអាមេរិក ថយចុះជាលំដាប់ តាមរយៈការចំណាយច្រើនជាងមុនទៅលើរថយន្តក្រុងដឹកសិស្ស និងតម្រូវការប្រើម៉ាស៉ីនភ្លើង ហើយក្រុមមន្ត្រីនិយាយថា ប្រហែលជាមិនអាចរ៉ាប់រងបានយូរទៀតទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី១៨ ខែឧសភា ឆ្នាំ២០២៦។

សាលារៀនរាប់ចាប់ពីស្រុក Yakima រដ្ឋ Washington រហូតដល់ស្រុក Waco រដ្ឋ Texas កំពុងប្រើថវិកាបម្រុង មកចំណាយលើការដឹកជញ្ជូនសិស្ស តាមរថយន្តក្រុងរបស់រដ្ឋ។ នៅរដ្ឋ Alaska ដែលដាច់ស្រយាល មន្ត្រីកំពុងប្រឹងប្រែងធ្វើយ៉ាងណាឱ្យមានប្រេងឥន្ធនៈគ្រប់គ្រាន់ ដើម្បីរក្សាចរន្តអគ្គិសនី។ នេះបើតាមបទសម្ភាសន៍របស់ Reuters។

លោក Trevor Greene អាជ្ញាធរស្រុក Yakima និយាយ​ថា វា​មិនមែន​ជាបញ្ហាដែលកើតមានតែមួយភ្លែត ហើយរលត់ទៅវិញទេ។ តាមក្រុមប្រឹក្សា American School Bus Council ប្រតិបត្តិកររថយន្តក្រុងដឹកសិស្ស គឺជាអ្នកទិញប្រេងម៉ាស៊ូតធំជាងគេ ដោយប្រើប្រាស់ម៉ាស៊ូតជាង ៨០០លានហ្គាឡុងជារៀងរាល់ឆ្នាំ។

ចាប់ពីខែធ្នូ ឆ្នាំ២០២៥ តម្លៃប្រេងម៉ាស៊ូត បានកើនឡើង ៦៧ភាគរយ គឺដល់ ៥.៥២ដុល្លារក្នុងមួយហ្គាឡុង ដែលជាការកើនឡើងបន្ថែម ប្រហែល ១.៨ពាន់លានដុល្លារទៅលើការចំណាយប្រចាំឆ្នាំ សម្រាប់ដំណើរការរថយន្តក្រុងដឹកសិស្ស។

គួរបញ្ជាក់ថា តាំងពីសង្គ្រាមអ៉ីរ៉ង់ ផ្ទុះឡើងនាចុងខែកុម្ភៈ តម្លៃប្រេងឥន្ធនៈបានកើនឡើងយ៉ាងខ្លាំង ធ្វើឱ្យសេដ្ឋកិច្ចពិភពលោកប្រែប្រួល។ វាក៏បានជះផលប៉ះពាល់នៅក្នុងសហរដ្ឋអាមេរិកផងដែរ៕