(កៀវ)៖ រដ្ឋមន្រ្តីការបរទេសអ៊ុយក្រែន លោក Andrii Sybiha បានឱ្យដឹងថា លោកបានជជែកទូរស័ព្ទ ជាមួយសមភាគីហុងគ្រី លោកស្រី Anita Orban ប្រកបដោយខ្លឹមសារ និងមានលក្ខណៈស្ថាបនា កាលពីថ្ងៃចុងសប្តាហ៍កន្លងទៅ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី១៨ ខែឧសភា ឆ្នាំ២០២៦។

លោក Sybiha និយាយថា ប្រទេសទាំងពីរព្រមព្រៀងគ្នាពិគ្រោះយោបល់ កម្រិតអ្នកជំនាញហុងគ្រី និងអ៊ុយក្រែនមួយជុំក្នុងសប្តាហ៍នេះ ដើម្បីស្វែងរកដំណោះស្រាយជាក់ស្តែង និងរឹងមាំសម្រាប់ជនជាតិភាគតិចហុងគ្រី នៅក្នុងតំបន់ Zakarpattia ប្រទេសអ៊ុយក្រែន។

តាមលោក Sybiha អ៊ុយក្រែនត្រៀមខ្លួនរួចជាស្រេច ដើម្បីធ្វើការជាមួយរដ្ឋាភិបាលហុងគ្រីថ្មី ជុំវិញបញ្ហាទ្វេភាគីទាំងអស់ ដោយមានគោលបំណងស្តារទំនុកចិត្ត និងទំនាក់ទំនងល្អ ក្នុងនាមជាអ្នកជិតខាងនឹងគ្នា៕