(អ៊ីស្លាម៉ាបាដ)៖ ប្រទេសប៉ាគីស្ថាន បានបញ្ជូនកងទ័ពចំនួន ៨,០០០នាក់ កងយន្តហោះចម្បាំងមួយកងអនុសេនាធំ និងប្រព័ន្ធការពារដែនអាកាសទៅកាន់ប្រទេសអារ៉ាប៊ីសាអូឌីត ក្រោមក្របខណ្ឌនៃកិច្ចព្រមព្រៀងការពារជាតិទៅវិញទៅមក។ ការបង្កើនកិច្ចសហប្រតិបត្តិការយោធាដ៏ធំសម្បើមនេះ ធ្វើឡើងស្របពេលដែលទីក្រុងអ៊ីស្លាម៉ាបាដ កំពុងដើរតួជាអ្នកសម្របសម្រួលដ៏សំខាន់នៅក្នុងសង្គ្រាមនៅអ៊ីរ៉ង់។ នេះបើតាមសេចក្តីរាយការណ៍ផ្តាច់មុខរបស់ទីភ្នាក់ងារសារព័ត៌មាន Reuters។

យោងតាមប្រភពពីមន្ត្រីសន្តិសុខ និងរដ្ឋាភិបាលចំនួន ៥រូប បានបញ្ជាក់ថា ការដាក់ពង្រាយកម្លាំងទ្រង់ទ្រាយធំនេះ គឺជាកងកម្លាំងប្រយុទ្ធដ៏មានសមត្ថភាពពេញលេញ ដែលមានគោលដៅគាំទ្រយោធាអារ៉ាប៊ីសាអូឌីត ក្នុងករណីប្រទេសនេះរងការវាយប្រហារបន្ថែមទៀត។ ទោះជាយ៉ាងណា យោធា និងក្រសួងការបរទេសប៉ាគីស្ថាន ព្រមទាំងរដ្ឋាភិបាលអារ៉ាប៊ីសាអូឌីត មិនទាន់មានការឆ្លើយតបជាផ្លូវការជុំវិញបញ្ហានេះនៅឡើយទេ។

គួរបញ្ជាក់ថា ថ្វីត្បិតតែលក្ខខណ្ឌលម្អិតនៃកិច្ចព្រមព្រៀងដែលបានចុះហត្ថលេខាកាលពីឆ្នាំមុន ត្រូវបានរក្សាជាការសម្ងាត់ក្តី ប៉ុន្តែភាគីទាំងពីរធ្លាប់បានបញ្ជាក់ថា កិច្ចព្រមព្រៀងនេះតម្រូវឱ្យប្រទេសទាំងពីរត្រូវជួយការពារគ្នាទៅវិញទៅមក ក្នុងករណីមានការវាយប្រហារ។ លើសពីនេះ រដ្ឋមន្ត្រីការពារជាតិប៉ាគីស្ថាន លោក ហាវ៉ាចា អាស៊ីហ្វ (Khawaja Asif) ធ្លាប់បានបង្ហើបថា កិច្ចព្រមព្រៀងនេះក៏បានដាក់អារ៉ាប៊ីសាអូឌីតឱ្យស្ថិតក្រោមឆត្រការពារអាវុធនុយក្លេអ៊ែររបស់ប៉ាគីស្ថានផងដែរ។

ប្រភពដដែលបានលាតត្រដាងថាកងអនុសេនាធំយន្តហោះចម្បាំងប្រមាណ ១៦គ្រឿង ដែលភាគច្រើនជាប្រភេទ JF-17 ផលិតរួមគ្នាជាមួយចិន ត្រូវបានបញ្ជូនទៅអារ៉ាប៊ីសាអូឌីតតាំងពីដើមខែមេសាមកម្ល៉េះ ព្រមទាំងមានការបញ្ជូនកងដ្រូនចំនួន ២កងអនុសេនាធំបន្ថែមទៀតផងដែរ។ ការដាក់ពង្រាយកម្លាំងទ័ព ៨,០០០នាក់នេះ ក៏រួមបញ្ចូលទាំងប្រព័ន្ធការពារដែនអាកាស HQ-9 របស់ចិនផងដែរ ដោយកម្លាំងប្រតិបត្តិការទាំងអស់គឺជាយោធាប៉ាគីស្ថាន ខណៈរាល់ការចំណាយត្រូវបានធានារ៉ាប់រងដោយអារ៉ាប៊ីសាអូឌីត៕