(ហ្សឺណែវ)៖ បណ្តាប្រទេសជាសមាជិកអង្គការសុខភាពពិភពលោក (WHO) នៅថ្ងៃចន្ទ បានសម្រេចបដិសេធសំណើអញ្ជើញកោះតៃវ៉ាន់ ឱ្យចូលរួមមហាសន្និបាតសុខភាពពិភពលោក (WHA) ប្រចាំឆ្នាំនៅទីក្រុងហ្សឺណែវ បន្ទាប់ពីប្រទេសចិនប្រកាសជំទាស់យ៉ាងដាច់អហង្ការ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងកិច្ចប្រជុំនោះ ប្រទេសចិន ដោយមានការគាំទ្រពីប៉ាគីស្ថាន បានរារាំងចលនានេះ ដោយតំណាងចិនបានបញ្ជាក់ជំហរថា ខ្លួនមិនអនុញ្ញាតឱ្យ «តំបន់តៃវ៉ាន់របស់ចិន» ចូលរួមក្នុងទម្រង់ណាមួយឡើយ ដែលការណ៍នេះបានជំរុញឱ្យមហាសន្និបាតសម្រេចផាត់តៃវ៉ាន់ចេញជាផ្លូវការ។ ជាការឆ្លើយតប ប្រទេសប៉ាឡូ (Palau) និងសម្ព័ន្ធមិត្តផ្សេងទៀតដែលគាំទ្រតៃវ៉ាន់ បានរិះគន់ថាការដកតៃវ៉ាន់ចេញ គឺជាការបង្កើតចន្លោះប្រហោង និងធ្វើឱ្យប្រព័ន្ធតាមដានសុខភាពសកលកាន់តែចុះខ្សោយ។

គួររំលឹកថា តៃវ៉ាន់ធ្លាប់បានចូលរួមក្នុងមហាសន្និបាតនេះជាអ្នកសង្កេតការណ៍ពីឆ្នាំ ២០០៩ ដល់ ២០១៦។ ប៉ុន្តែចាប់តាំងពីឆ្នាំ២០១៧ មក ទីក្រុងប៉េកាំងបានបិទផ្លូវតៃវ៉ាន់ទាំងស្រុង បន្ទាប់ពីអតីតប្រធានាធិបតី លោកស្រី សៃ អ៊ីងវិន (Tsai Ing-wen) ដែលបដិសេធគោលការណ៍ «ចិនតែមួយ» បានឡើងកាន់តំណែង ដោយចិនតែងតែចាត់ទុកកោះប្រជាធិបតេយ្យមួយនេះថាជាផ្នែកមួយនៃទឹកដីរបស់ខ្លួន និងរារាំងមិនឱ្យចូលរួមក្នុងស្ថាប័នអន្តរជាតិនានាឡើយ៕