(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយថារូបលោកមានការព្រួយបារម្ភចំពោះការឆ្លងរាលដាលនៃជំងឺ Ebola នៅក្នុងសាធារណរដ្ឋប្រជាធិបតេយ្យកុងហ្គោ តែលោកជឿថាបច្ចុប្បន្ន ជំងឺនេះមិនបានឆ្លងរាលដាលដល់សហរដ្ឋអាមេរិកនោះទេ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ថ្លែងទៅកាន់ក្រុមអ្នកសារព័ត៌មានកាលពីថ្ងៃចន្ទ ទី១៨ ខែឧសភា ឆ្នាំ២០២៦ នៅពេលត្រូវបានចោទសួរថាតើលោកមានការព្រួយបារម្ភដែរឬទេចំពោះជំងឺ Ebola បន្ទាប់ពីជនជាតិអាមេរិក ម្នាក់ឆ្លងជំងឺនេះនៅក្នុងសាធារណរដ្ឋប្រជាធិបតេយ្យកុងហ្គោ លោក ត្រាំ បានគូសបញ្ជាក់ដូច្នេះថា «ខ្ញុំពិតជាមានការព្រួយបារម្ភ។ ខ្ញុំគិតថាបច្ចុប្បន្នវាកំពុងឆ្លងរាលដាលតែក្នុងតំបន់អាហ្វ្រិក ប៉ុន្តែយ៉ាងណា វាពិតជាមានការឆ្លងរាលដាលមែន»។

គួរបញ្ជាក់ថា កាលពីថ្ងៃអាទិត្យ ទី១៧ ខែឧសភា ឆ្នាំ២០២៦ អង្គការសុខភាពពិភពលោក WHO បានសម្រេចប្រកាសចាត់ថ្នាក់ការផ្ទុះរាលដាលជំងឺអេបូឡា នៅសាធារណរដ្ឋប្រជាធិបតេយ្យកុងហ្គោ និងអ៊ូហ្កង់ដា ជាភាពអាសន្នផ្នែកសុខភាពសាធារណៈនៃការព្រួយបារម្ភអន្តរជាតិ ឬហៅកាត់ថា PHEIC។ WHO បាននិយាយថា ការរីករាលដាល ដែលបង្កឡើងដោយវីរុសអេបូឡាអម្បូរ Bundibugyo គឺមិនទាន់ឈានដល់លក្ខណៈវិនិច្ឆ័យដែលត្រូវចាត់ទុកជា​ ជំងឺឆ្លងរាតត្បាតជាសកល ឬ pandemic ដែលជាភាពអាសន្នធ្ងន់ធ្ងរបំផុតនៅឡើយទេ ប៉ុន្តែប្រទេសនានាដែលមានព្រំប្រទល់ជាប់កុងហ្គោ គឺស្ថិតក្នុងហានិភ័យខ្ពស់នៃការឆ្លងរាលដាលខ្លាំងថែមទៀត។

តាម WHO គិតត្រឹមថ្ងៃសោរ៍សប្តាហ៍មុន មានករណីស្លាប់ដែលសង្ស័យចំនួន៨០ករណី, ករណីបញ្ជាក់ពីមន្ទីរពិសោធន៍៨ករណី, និងករណីឆ្លងសង្ស័យ ២៤៦ករណី ដែលត្រូវបានរាយការណ៍នៅខេត្ត Ituri របស់កុងហ្គោ។ WHO បានឱ្យដឹងទៀតថាការឆ្លងរាលដាលនេះ គឺជាករណីពិសេស ដ្បិតសព្វថ្ងៃមិនទាន់មានវិធីព្យាបាល ឬវ៉ាក់សាំងប្រឆាំងវីរុសអេបូឡា Bundibugyo ដែលត្រូវបានទទួលស្គាល់ ខុសពីវីរុសអេបូឡាអម្បូរ Zaire។ WHO បានសង្កត់ធ្ងន់ថា ការផ្ទុះករណីឆ្លងនៅកុងហ្គោនិងអ៊ូហ្កង់ដា បង្កហានិភ័យសុខភាពសាធារណៈ ចំពោះប្រទេសដទៃទៀត៕