(កូប៉ិនហាក)៖ រដ្ឋាភិបាល Greenland បានអះអាងកាលពីថ្ងៃចន្ទ ទី១៨ ខែឧសភា ឆ្នាំ២០២៦ ពីភាពរីកចម្រើនក្នុងកិច្ចពិភាក្សាកម្រិតខ្ពស់ជាមួយសហរដ្ឋអាមេរិក ជុំវិញអនាគតរបស់ Greenland ប៉ុន្តែនៅតែទទូចថាដែនកោះដ៏ធំល្វឹងល្វើយមួយនេះមិនមែនសម្រាប់លក់នោះទេ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

បេសកជនពិសេសអាមេរិក លោក Jeff Landry ដែលត្រូវបានលោកប្រធានាធិបតី ដូណាល់ ត្រាំ តែងតាំងកាលពីឆ្នាំមុនដើម្បីជំរុញការគ្រប់គ្រងរបស់សហរដ្ឋអាមេរិកលើ Greenland បានធ្វើដំណើរទៅដល់ទីក្រុង Nuuk កាលពីថ្ងៃអាទិត្យសប្ដាហ៍មុន និងបានជួបនាយករដ្ឋមន្ត្រី Greenland លោក Jens-Frederik Nielsen និងរដ្ឋមន្ត្រីការបរទេស លោក Mute Egede កាលពីថ្ងៃចន្ទដើមសប្ដាហ៍នេះ។

លោក Nielsen បានប្រាប់ក្រុមអ្នកសារព័ត៌មានក្រោយជួបលោក Landry ថាលោកជឿជាថាមានភាពរីកចម្រើនក្នុងកិច្ចពិភាក្សា ហើយថាខាងភាគី Greenland កំពុងផ្ដោតលើ ការស្វែងរកដំណោះស្រាយមួយដែលល្អសម្រាប់យើងទាំងអស់គ្នា និងធានាឱ្យបានថាការសម្លុតគំរាមដណ្ដើមកាន់កាប់ ឬការទិញយក Greenland នឹងមិនកើតឡើងដាច់ខាត។

គួរបញ្ជាក់ថា ការអះអាងរបស់លោក ត្រាំ ថាសហរដ្ឋអាមេរិកត្រូវតែទិញយក ឬគ្រប់គ្រង Greenland ដែលជាទឹកដីស្វយ័តរបស់ដាណឺម៉ាក ឱ្យទាល់តែ បានបង្កឱ្យមានភាពតានតឹងរវាង ទីក្រុងវ៉ាស៊ីនតោន និងទីក្រុងកូប៉ិនហាក ដែលសុទ្ធសឹងជាសមាជិក NATO៕