(វ៉ាស៉ីនតោន)៖ កាលពីថ្ងៃចន្ទ ទី១៨ ខែឧសភា ឆ្នាំ២០២៦ ក្រុមឃ្លាំមើលសិទ្ធិមនុស្ស ហៅកាត់ HRANA ដែលមានមូលដ្ឋាននៅសហរដ្ឋអាមេរិក បានអះអាងថា អាជ្ញាធរអ៉ីរ៉ង់ បានចាប់ខ្លួនមនុស្សសរុបច្រើនជាង៤០០០នាក់ ក្រោមបទចោទប្រកាន់ផ្សេងៗ ពាក់ព័ន្ធទៅនឹងសង្រ្គាមជាមួយអាមេរិកនិងអ៉ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

HRANA បាននិយាយថា ខ្លួនបានកត់ត្រាការចាប់ខ្លួនយ៉ាងហោច៤០២៣ករណី គិតត្រឹមចន្លោះថ្ងៃទី២៨ ខែកុម្ភៈ ជាពេលដែល​សង្រ្គាមផ្ទុះឡើង ដល់ថ្ងៃទី៩ ខែឧសភា។ បទចោទប្រកាន់នៃការចាប់ខ្លួនទាំងនោះ រួមមានចាប់តាំងពីការធ្វើចារកម្ម ការគំរាមកំហែងសន្តិសុខជាតិ រហូតដល់ការលួចទំនាក់ទំនង ឬចែករំលែកព័ត៌មាន ពាក់ព័ន្ធនឹងជម្លោះ ជាមួយប្រព័ន្ធផ្សព្វផ្សាយបរទេស។

ទន្ទឹមគ្នា មេប៉ូលិសជាតិអ៉ីរ៉ង់ លោក Ahmad Reza Radan កាលពីថ្ងៃអាទិត្យចុងសប្តាហ៍កន្លងទៅនេះ បាននិយាយថា ជនក្បត់និងគិញសម្ងាត់សរុបទាំងអស់លើស៦៥០០នាក់ ដែលមានទំនាក់ទំនងជាមួយសត្រូវ ត្រូវបានចាប់ខ្លួន គិតចាប់តាំងពីចលនាបាតុកម្មប្រឆាំងរដ្ឋាភិបាល បានកើនឡើងដល់ចំណុចកំពូល កាលពីខែមករា។

មិនតែប៉ុណ្ណោះ ការប្រហារជីវិតមនុស្សក៏មានការកើនឡើងខ្លាំង នៅប្រទេសអ៉ីរ៉ង់ផងដែរ។ ក្រុមសិទ្ធិមនុស្សបានរាយការណ៍ថា តាំងពីសង្រ្គាមចាប់ផ្តើមមក អ៉ីរ៉ង់បានប្រហារជីវិតមនុស្សយ៉ាងហោច២៦នាក់ ដែលត្រូវបានចាត់ទុកជាអ្នកទោសនយោបាយ ហើយ៦នាក់ផ្សេងទៀត ត្រូវបានព្យួរកពីបទលួចយកការណ៍ឱ្យអ៉ីស្រាអែល។

គួរបញ្ជាក់ថា HRANA ក៏បានកត់ត្រា នូវតួលេខមនុស្សស្លាប់យ៉ាងហោច ៣៦៣៦នាក់ ក្នុងនោះ១៧០១នាក់ ជាជនស៉ីវិល ដោយសារការវាយប្រហាររបស់អាមេរិក និងអ៉ីស្រាអែលលើប្រទេសអ៉ីរ៉ង់ អំឡុងពេលសង្រ្គាម ខណៈនាពេលនេះ ការប្រយុទ្ធគ្នា កំពុងត្រូវបានផ្អាកក្រោមបទឈប់បាញ់ដ៏ផុយស្រួយ៕