(វ៉ាស៉ីនតោន)៖ កាលពីថ្ងៃចន្ទ ទី១៨ ខែឧសភា ឆ្នាំ២០២៦ ក្រសួងហិរញ្ញវត្ថុសហរដ្ឋអាមេរិក បានសម្រេចបន្តសុពលភាព៣០ថ្ងៃទៀត ចំពោះការលើកលែងទណ្ឌកម្មរបស់ខ្លួ នលើប្រេងរុស្ស៉ីដែលស្ថិតនៅសមុទ្រស្រាប់ ស្របពេលតម្លៃប្រេងសកល នៅតែបន្តឡើងថ្លៃខ្ពស់ ដោយសារសង្រ្គាមអ៉ីរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សេចក្តីប្រកាសខាងលើគឺជាលើកទី២ហើយ ដែលអាមេរិកបានបន្តសុពលភាពចំណាត់ការបណ្តោះអាសន្ននេះ ខណៈវាមានគោលដៅ​ ដើម្បីជួយទប់ទល់ផលប៉ះពាល់នៃការផ្គត់ផ្គង់ប្រេង ដែលបង្កឡើងដោយការធ្វើសង្រ្គាមរបស់សហរដ្ឋអាមេរិកនិងអ៉ីស្រាអែល ប្រឆាំងលើប្រទេសអ៉ីរ៉ង់ កាលពីចុងខែកុម្ភៈ។

អ៉ីរ៉ង់បានធ្វើសកម្មភាពសងសឹកវិញ ដោយវាយប្រហារសម្ព័ន្ធមិត្តអាមេរិកនៅក្នុងតំបន់ ហើយបិទខ្ទប់សឹងទាំងស្រុងនូវច្រកសមុទ្រ Hormuz ជាច្រកផ្លូវទឹកដ៏សំខាន់ ដែលប្រេងនិងឧស្ម័នពិភពលោកប្រហែល២០ភាគរយ ជាទូទៅត្រូវបានដឹកជញ្ជូនឆ្លងកាត់។ ជាលទ្ធផល តម្លៃប្រេងអន្តរជាតិបានហក់ឡើងខ្ពស់យ៉ាងគំហុក ចាប់តាំងពីសង្រ្គាមផ្ទុះឡើង។

គួរបញ្ជាក់ថា សហរដ្ឋអាមេរិក បានសម្រេចលើកលែងទណ្ឌកម្មចំពោះប្រេងរុស្ស៉ីដែលនៅសមុទ្រស្រាប់ ជាលើកដំបូង កាលពីខែមីនា។ ការបន្តសុពលភាពថ្មីចុងក្រោយបង្អស់នេះ នឹងមានរយៈពេលដល់ថ្ងៃទី១៧ ខែមិថុនា បន្ទាប់ពីការបន្តសុពលភាពចាស់ បានផុតកំណត់កាលពីថ្ងៃទី១៦ ខែឧសភា៕