(វ៉ាស៉ីនតោន)៖ កាលពីថ្ងៃចន្ទ ទី១៨ ខែឧសភា ឆ្នាំ២០២៦ សហរដ្ឋអាមេរិក បានឱ្យដឹងថា ខ្លួនបានអនុម័តការលក់ឧទ្ធម្ភាគចក្រយោធា ក្នុងតម្លៃសរុបជាង៤ពាន់លានដុល្លារ ឱ្យទៅប្រទេសកូរ៉េខាងត្បូង ដែលបានប្តេជ្ញាបង្កើនការទិញសព្វាវុធពីសហរដ្ឋអាមេរិក ដើម្បីពង្រឹងការការពារខ្លួនប្រឆាំងប្រទេសកូរ៉េខាងជើង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្រសួងការបរទេសអាមេរិក បានប្រកាសពីការផ្តល់ភ្លើងបៃតងសម្រាប់ឱ្យកូរ៉េខាងត្បូង ចំណាយថវិកា៣ពាន់លានដុល្លារ ដើម្បីទិញឧទ្ធម្ភាគចក្រប្រឆាំងនាវាមុជទឹក Romeo Seahawk ចំនួន២៤គ្រឿង។ ក្រៅពីនេះ ក្រសួងការបរទេសអាមេរិក ក៏បានអនុម័តការលក់ក្នុងតម្លៃ១,២ពាន់លានដុល្លារផងដែរ សម្រាប់ការដំឡើងសមត្ថភាពឧទ្ធម្ភាគចក្រប្រយុទ្ធ Apache របស់កូរ៉េខាងត្បូង។

គួរបញ្ជាក់ថា ប្រធានាធិបតីកូរ៉េខាងត្បូង លោក Lee Jae Myung ធ្លាប់បានសន្យាអំឡុងកិច្ចប្រជុំកំពូល កាលពីខែវិច្ឆិកា ឆ្នាំ២០២៥ ជាមួយប្រធានាធិបតីអាមេរិក លោក ដូណាល់ ត្រាំ ថាទីក្រុងសេអ៊ូលនឹងទិញបរិក្ខារយោធាសរុប ២៥ពាន់ដុល្លារ​ពីសហរដ្ឋអាមេរិក គិតត្រឹមឆ្នាំ២០៣០ ហើយចំណាយ៣៣ពាន់លានដុល្លារ ដើម្បីគាំទ្រកងកម្លាំងយោធាអាមេរិក ដែលឈរជើងនៅកូរ៉េខាងត្បូង៕