(តៃប៉ិ)៖ នាថ្ងៃអង្គារ ទី១៩ ខែឧសភា ឆ្នាំ២០២៦​ នាយករដ្ឋមន្រ្តីតៃវ៉ាន់ លោក Cho Jung-tai បានលើកឡើងថា ចិនគឺជាប្រភពចម្បងបំផុតនៃភាពខ្វាយខ្វល់និងអស្ថិរភាពនៅក្នុងតំបន់ ដោយសារតែការធ្វើសកម្មភាពយោធាឥតឈប់ឈរ​របស់ទីក្រុងប៉េកាំង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ថ្លែងប្រាប់ក្រុមអ្នកសារព័ត៌មាននៅទីក្រុងតៃប៉ិ មុនគម្រប់ខួប២ឆ្នាំនាថ្ងៃពុធសប្តាហ៍នេះ នៃការឡើងកាន់តំណែងរបស់លោក Lai Ching-te ជាមេដឹកនាំតៃវ៉ាន់ លោក Cho បានបង្ហាញក្តីបារម្ភអំពីចេតនារបស់ចិន។ លោក Cho បានលើកឡើងយ៉ាងដូច្នេះថា «ចិនបន្តធ្វើសមយុទ្ធយោធាគ្រប់ទំហំនិងគ្រប់ប្រភេទ នៅតំបន់ច្រកសមុទ្រតៃវ៉ាន់ តំបន់ឥណ្ឌូប៉ាស៉ីហ្វិក តំបន់សមុទ្រចិនខាងត្បូង និងសូម្បីតែនៅក្បែរប្រទេសជប៉ុន ដែលប៉ះពាល់ដល់សុវត្ថិភាពនៃការធ្វើនាវាចរណ៍។ នេះហើយគឺជាប្រភពចម្បងបំផុត នៃភាពខ្វាយខ្វល់និងអស្ថិរភាពនៅក្នុងតំបន់»។

ប៉ុន្មានឆ្នាំមកនេះ កងកម្លាំងប្រដាប់អាវុធចិន បានធ្វើប្រតិបត្តិការសឹងតែរៀងរាល់ថ្ងៃនៅក្បែរកោះតៃវ៉ាន់ ហើយនាថ្ងៃអង្គារនេះ កងទ័ពជើងទឹកចិនបានប្រកាសថា នាវាយោធាមួយក្រុមដឹកនាំនាវាផ្ទុកយន្តហោះចម្បាំង Liaoning ត្រូវបានបញ្ជូនទៅកាន់ដែនទឹក នៅភាគខាងលិចមហាសមុទ្រប៉ាស៉ីហ្វិក ប៉ុន្តែមិនបានប្រាប់ទីតាំងជាក់លាក់នោះទេ។ បើតាមកងទ័ពជើងទឹកចិន ​ក្រុមនាវាយោធានោះ នឹងធ្វើសមយុទ្ធបាញ់គ្រាប់ពិត រួមជាមួយលំហាត់យោធាផ្សេងៗទៀត ដើម្បីធ្វើតេស្តនិងពង្រឹងសមត្ថភាពរបស់ខ្លួន។

គួរបញ្ជាក់ថា ចិនចាត់ទុកតៃវ៉ាន់ជាផ្នែកនៃទឹកដីរបស់ខ្លួន ហើយបានបង្កើនការដាក់សម្ពាធទាំងផ្នែកយោធានិងនយោបាយ ព្រមទាំង​បដិសេធបំណងចង់បើកកិច្ចសន្ទនារបស់លោក Lai Ching-te ដោយទីក្រុងប៉េកាំង ហៅលោកថាជាបុគ្គលចង់បំបែករដ្ឋ។ ចិនមិនដែលបោះបង់ចោលឡើយ នូវលទ្ធភាពប្រើប្រាស់កម្លាំងយោធាដើម្បីគ្រប់គ្រងកោះតៃវ៉ាន់ ប្រសិនបើចាំបាច់៕