(ស៉ីដនី)៖ អូស្រ្តាលី បានប្រកាសថា នឹងទទួលបានប្រេងឥន្ធនៈយន្តហោះ ៣កប៉ាល់ ពីប្រទេសចិន និងផលិតផលជីអ៊ុយរ៉េបន្ថែមទៀតពីប្រទេសព្រុយណេ ដែលនឹងជួយធានាដល់ការផ្គត់ផ្គង់ ចំពេលមានវិបត្តិសង្រ្គាមអ៉ីរ៉ង់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី១៩ ខែឧសភា ឆ្នាំ២០២៦។

យោងតាមរដ្ឋាភិបាលអូស្រ្តាលី ប្រេងឥន្ធនៈយន្តហោះច្រើនជាង ៦០០ ០០០បារ៉ែល នឹងមកដល់អូស្រ្តាលីនាដើមខែមិថុនា ផ្អែកតាមការពិភាក្សារវាងលោកនាយករដ្ឋមន្រ្តី Anthony Albanese និងនាយករដ្ឋមន្រ្តីចិន Li Qiang។ ក្រៅពីនេះ អូស្រ្តាលីទទួលបានការផ្គត់ផ្គង់ជីអ៊ុយរ៉េ ៣៨ ៥០០តោនពីព្រុយណេ ដើម្បីយកទៅជួយដល់កសិករ និងវិស័យកសិកម្ម។ ប្រេងឥន្ធនៈយន្តហោះ និងជីអ៊ុយរ៉េពីការផ្គត់ផ្គង់នេះ អូស្រ្តាលីត្រូវចំណាយអស់ ៥.៣៦ពាន់លានដុល្លារអាមេរិក។

គួរបញ្ជាក់ថា អូស្ត្រាលី ដែលនាំចូលឥន្ធនៈភាគច្រើននៃតម្រូវការរបស់ខ្លួន បានជួបប្រទះនឹងភាពខ្វះខាត ចាប់តាំងពីមានសង្រ្គាមនៅតំបន់មជ្ឈិមបូព៌ា នៅចុងខែកុម្ភៈ៕