(ហុងកុង)៖ អាជ្ញាធរចិនបានប្រកាសនៅថ្ងៃអង្គារថា ភ្លៀងធ្លាក់យ៉ាងខ្លាំង និងគ្រោះទឹកជំនន់នៅទូទាំងភាគខាងត្បូង និងភាគកណ្តាលប្រទេសចិន បានបណ្តាលឱ្យមនុស្សយ៉ាងហោចណាស់ ១៨នាក់បាត់បង់ជីវិត និងបង្ខំឱ្យបិទសាលារៀន អាជីវកម្ម ព្រមទាំងរំខានដល់ប្រព័ន្ធដឹកជញ្ជូន និងការផ្គត់ផ្គង់អគ្គិសនីយ៉ាងធ្ងន់ធ្ងរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

យោងតាមប្រព័ន្ធផ្សព្វផ្សាយរដ្ឋចិន CCTV ករណីស្លាប់ទាំងនោះរួមមាន មនុស្ស ១០នាក់បានស្លាប់បន្ទាប់ពីរថយន្តដឹកកម្មករកសិកម្មធ្លាក់ចូលទៅក្នុងទន្លេនៅតំបន់ក្វាងស៊ី (Guangxi) ៤នាក់នៅខេត្តគួយចូវ (Guizhou) ៣នាក់នៅខេត្តហ៊ូប៉ី (Hubei) និងម្នាក់ទៀតនៅខេត្តហ៊ូណាន (Hunan)។ ដោយឡែក រូបភាពលើបណ្តាញសង្គមបានបង្ហាញពីស្ថានភាពទឹកជំនន់យ៉ាងធ្ងន់ធ្ងរនៅទីក្រុងជីងចូវ (Jingzhou) ខេត្តហ៊ូប៉ី ដោយទឹកបានជន់លិចរថយន្តស្ទើរតែទាំងស្រុង ហើយប្រជាពលរដ្ឋខ្លះអាចចាប់ត្រីបាននៅតាមដងផ្លូវថែមទៀតផង។

ដើម្បីឆ្លើយតបនឹងគ្រោះមហន្តរាយនេះ រដ្ឋាភិបាលចិនបានទម្លាក់កញ្ចប់ថវិកាសង្គ្រោះបន្ទាន់ចំនួន ១៥០លានយាន់ (ប្រមាណ ២២,០៤លានដុល្លារអាមេរិក) និងកំពុងជម្លៀសប្រជាពលរដ្ឋចេញពីតំបន់រងគ្រោះ។ ទន្ទឹមនឹងនេះ ទីភ្នាក់ងារអាកាសធាតុចិន ក៏បានចេញការព្រមានពីហានិភ័យខ្ពស់នៃការបាក់ដី និងទឹកជំនន់ភ្លាមៗ នៅក្នុងខេត្ត និងតំបន់ចំនួន៨ ផ្សេងទៀត ដែលតម្រូវឱ្យមានការប្រុងប្រយ័ត្នខ្ពស់បំផុត៕