(ហ្សឺណែវ)៖ «ក្រុមប្រឹក្សាសន្តិភាព» (Board of Peace) របស់ប្រធានាធិបតីអាមេរិក លោក ដូណាល់ ត្រាំ បានចេញរបាយការណ៍ជំរុញឱ្យមានការដោះស្រាយជាបន្ទាន់ នូវគម្លាតរវាងទំហំទឹកប្រាក់ដែលបានសន្យា និងការបញ្ចេញថវិកាជាក់ស្តែង សម្រាប់គម្រោងកសាងតំបន់ហ្គាហ្សាឡើងវិញ ខណៈដែលគម្រោងតម្លៃ ៧០ពាន់លានដុល្លារនេះ អាចនឹងប្រឈមមុខនឹងកង្វះខាតសាច់ប្រាក់នាពេលខាងមុខ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រុមប្រឹក្សាសន្តិភាពនេះ ត្រូវបានបង្កើតឡើងដោយលោក ត្រាំ ដើម្បីត្រួតពិនិត្យផែនការមហិច្ឆតាក្នុងការបញ្ចប់សង្គ្រាមរបស់អ៊ីស្រាអែលនៅហ្គាហ្សា និងជួយកសាងដែនដីដែលខ្ទេចខ្ទាំនេះឡើងវិញ ហើយទោះបីជាត្រូវបានទទួលស្គាល់ដោយក្រុមប្រឹក្សាសន្តិសុខក្តី ប៉ុន្តែប្រទេសមហាអំណាចធំៗជាច្រើននៅមិនទាន់ចូលរួមនៅឡើយទេ។

គួរបញ្ជាក់ថា កាលពីខែមេសា Reuters ធ្លាប់បានរាយការណ៍ថា ក្រុមប្រឹក្សានេះទទួលបានប្រាក់ត្រឹមតែមួយផ្នែកតូចប៉ុណ្ណោះ ក្នុងចំណោមទឹកប្រាក់ ១៧ពាន់លានដុល្លារដែលសមាជិកបានសន្យា ដែលធ្វើឱ្យរាំងស្ទះដល់ការអនុវត្តផែនការ។ ទោះជាយ៉ាងណា ក្រុមប្រឹក្សាធ្លាប់បានទាត់ចោលរបាយការណ៍នេះ ដោយអះអាងថា ខ្លួនមិនមានបញ្ហាខ្វះខាតថវិកាទេ ហើយគ្រាន់តែស្នើសុំប្រាក់នៅពេលមានតម្រូវការជាក់ស្តែងប៉ុណ្ណោះ៕