(ដាម៉ាស)៖ អាជ្ញាធរស៊ីរីបានឱ្យដឹងថា នៅថ្ងៃអង្គារ មានករណីផ្ទុះរថយន្តមួយគ្រឿងនៅក្បែរអគារក្រសួងការពារជាតិ ក្នុងតំបន់ Bab Sharqi នៃរដ្ឋធានីដាម៉ាស ដែលបណ្តាលឱ្យទាហានម្នាក់ស្លាប់ និងមនុស្ស ១២នាក់ផ្សេងទៀតរងរបួស។ នេះបើតាមការចេញផ្សាយដោយទីភ្នាក់ងារសារព័ត៌មានចិន Xinhua។

យោងតាមរដ្ឋបាលប្រព័ន្ធផ្សព្វផ្សាយ បានបញ្ជាក់ថា មុនពេលផ្ទុះឡើង កងកម្លាំងយោធាបានប្រទះឃើញគ្រឿងផ្ទុះមួយនៅក្បែរអគាររបស់ខ្លួន ហើយក៏បានព្យាយាមដោះវា ប៉ុន្តែស្រាប់តែមានរថយន្តផ្ទុកគ្រាប់បែកមួយគ្រឿង ដែលចតនៅក្បែរនោះបានផ្ទុះឡើងតែម្តង។ សាក្សីនៅកន្លែងកើតហេតុបានប្រាប់ Xinhua ថា សំឡេងផ្ទុះដ៏ខ្លាំងនេះ អាចឮសូរដល់តំបន់ជាច្រើនក្នុងទីក្រុងដាម៉ាស ហើយក្រោយមកក៏មានស្នូរការបាញ់ប្រហារផងដែរ។

គួរបញ្ជាក់ថា ចាប់តាំងពីការដួលរលំនៃរបបអតីតប្រធានាធិបតី Bashar al-Assad កាលពីខែធ្នូ ឆ្នាំ២០២៤ មក សង្គ្រាមជួរមុខទ្រង់ទ្រាយធំនៅស៊ីរីមានការថយចុះ ប៉ុន្តែអសន្តិសុខនៅតែបន្តកើតមាន ដូចជា ការផ្ទុះរថយន្ត គ្រាប់កែច្នៃ ការវាយប្រហារតាមអាកាសពីអ៊ីស្រាអែល និងគ្រាប់មីនសេសសល់ពីសង្គ្រាមរយៈពេលជាង ១៤ឆ្នាំមកនេះ៕