(វ៉ាស៊ីនតោន)៖ មន្ត្រីសេតវិមានម្នាក់ កាលពីថ្ងៃអង្គារ ទី១៩ ខែឧសភា ឆ្នាំ២០២៦ បានឱ្យដឹងថាប្រធានាធិបតីអាមេរិក លោក ដូណាល់ ត្រាំ នឹងទៅចូលរួមកិច្ចប្រជុំរបស់
បណ្ដាមេដឹកនាំនៃក្រុមប្រទេស G7 នៅក្នុងប្រទេសបារាំង នៅខែមិថុនាខាងមុខ។ នេះបើតាមការដកស្រង់ចេញផ្សាយដោយទីភ្នាក់ងារសារព័ត៌មាន​ Reuters។

សារព័ត៌មានអាមេរិក Axios ដែលបានរាយការណ៍មុនគេពីព័ត៌មានខាងលើ បានបញ្ជាក់ថាលោក ត្រាំ ចង់ពិភាក្សាអំពីការទាញភ្ជាប់ជំនួយរបស់សហរដ្ឋអាមេរិកទៅនឹង ការធ្វើពាណិជ្ជកម្ម ការជំរុញការប្រើប្រាស់បច្ចេកវិទ្យា AI របស់ក្រុមហ៊ុនអាមេរិក និងការកាត់បន្ថយការក្ដោបក្ដាប់របស់ចិនលើខ្សែច្រកវ៉ាក់ផ្គត់ផ្គង់រ៉ែកម្រ រួមទាំងប្រធានបទមួយចំនួនទៀត នៅក្នុងកិច្ចប្រជុំជាមួយបណ្ដាមេដឹកនាំ G7។

គួរបញ្ជាក់ថា បារាំងក្នុងឆ្នាំ២០២៦នេះ នឹងត្រូវធ្វើជាម្ចាស់ផ្ទះរៀបចំកិច្ចប្រជុំកំពូល​ G7 ចាប់ពីថ្ងៃទី១៥ ដល់ថ្ងៃទី១៧ ខែមិថុនា ក្នុងគ្រាដែលទំនាក់ទំនងរបស់លោក ត្រាំ ជាមួយមេដឹកនាំ G7 ដទៃទៀតកំពុងមានភាពតានតឹងដោយសារតែសង្រ្គាមអ៉ីរ៉ង់ និងបញ្ហាមួយចំនួនទៀត៕