(តៃប៉ិ)៖ មេដឹកនាំតៃវ៉ាន់ លោក Lai Ching-te នៅថ្ងៃពុធ ទី២០ ខែឧសភា ឆ្នាំ២០២៦ បាននិយាយថាគ្មានបរទេសណាមួយដែលអាចសម្រេចចិត្តលើជោគវាសនារបស់តៃវ៉ាន់ បាននោះទេ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការកត់សម្គាល់របស់លោក Lai Ching-te ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានព្រលយថាការលក់អាវុធឱ្យកោះតៃវ៉ាន់អាចនឹងត្រូវបានប្រើប្រាស់ជាសន្លឹកបៀរនៅក្នុងកិច្ចចរចាជាមួយចិនដែលអះអាងថាតៃវ៉ាន់ជាផ្នែកមួយនៃទឹកដីរបស់ខ្លួន និងគំរាមថានឹងប្រើប្រាស់កម្លាំងយោធាដើម្បីបង្រួបបង្រួម នៅក្នុងករណីចាំបាច់។

នៅក្នុងសុន្ទរកថាមួយនាឱកាសខួបឆ្នាំ២នៃការឡើងកាន់តំណែងជាមេដឹកនាំតៃវ៉ាន់ លោក Lai Ching-te បានគូសបញ្ជាក់ដូច្នេះថា «អនាគតតៃវ៉ាន់មិនអាចត្រូវបានសម្រេចដោយបរទេសណាមួយឡើយ ហើយក៏មិនអាចក្លាយជាចំណាប់ខ្មាំងនៃភាពភ័យខ្លាច ការបំបែកបំបាក់ ឬផលប្រយោជន៍រយៈពេលខ្លីនោះដែរ»។

គួរបញ្ជាក់ថា ការអត្ថាធិប្បាយរបស់លោក ដូណាល់ ត្រាំ នៅក្នុងបទសម្ភាសន៍ជាមួយទូរទស្សន៍ Fox News និងនៅលើយន្ដហោះ Air Force One ធ្វើឡើងក្រោយបញ្ចប់ទស្សនកិច្ចនៅប៉េកាំង ជាទីដែលលោកប្រធានាធិបតីចិន ស៊ី ជីនពីង ដាក់សម្ពាធឱ្យរូបលោកបញ្ឈប់ការគាំទ្រតៃវ៉ាន់។ ក្រោយទស្សនកិច្ចនៅចិនរបស់លោក ត្រាំ តៃវ៉ាន់បានអះអាងជាបន្តបន្ទាប់ថាគោលនយោបាយរបស់សហរដ្ឋអាមេរិកចំពោះតៃវ៉ាន់មិនមានការផ្លាស់ប្ដូរទេ ហើយថាលោក ត្រាំក៏មិនបានធ្វើការប្ដេជ្ញាចិត្តជាមួយចិនជុំវិញការលក់អាវុធឱ្យតៃវ៉ាន់ នោះដែរ។

ទីក្រុងតៃប៉ិថែមទាំងចោទទៀតផងថាចិនជាមូលហេតុចម្បងនៃអស្ថិរភាពក្នុងតំបន់ និងថាការលក់អាវុធរបស់អាមេរិកគឺជាការប្ដេជ្ញាចិត្តចងភ្ជាប់ដោយច្បាប់ ដើម្បីការពារកោះតៃវ៉ាន់៕