(តូក្យូ)៖ បុរសជនជាតិអាមេរិក ២នាក់ត្រូវបានចាប់ខ្លួន បន្ទាប់ពីបានផ្លោះចូលទៅរោងសត្វស្វា ក្នុងសួនសត្វក្រុង Ichikawa ជាទីកូនស្វាដ៏ល្បីល្បាញលើអ៉ីនធឺណេត ឈ្មោះ Punch នៅទីនោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃពុធ ទី២០ ខែឧសភា ឆ្នាំ២០២៦។

បុរសម្នាក់ដែលអះអាងថា ខ្លួនជានិស្សិតមហាវិទ្យាល័យ អាយុ ២៤ឆ្នាំ ត្រូវបានចាប់ខ្លួនកាលពីថ្ងៃអាទិត្យ បន្ទាប់ពីបានឡើងរបង ហើយលោតចុះទៅប្រឡាយស្ងួត ជុំវិញកន្លែងទស្សនាសត្វស្វា នៅសួនសត្វ Ichikawa ជាយទីក្រុងតូក្យូ។ រីឯ​បុរស​ម្នាក់​ទៀត ​ដែល​ជាអ្នកធ្វើសកម្មភាព​ថត អះអាងថារូបគេជា​អ្នកចម្រៀង​ មានអាយុ​២៧​ឆ្នាំ។

រូបភាព និងវីដេអូចែកចាយលើបណ្តាញសង្គម បង្ហាញឱ្យឃើញបុរសម្នាក់ ផ្លោះរបងហើយលោតចុះក្រោម នាំឱ្យផ្អើលសត្វស្វានៅក្នុងរោង តែមិនទាន់បានចូលទៅជិតទេ ក៏ត្រូវបានចាប់ខ្លួនដោយមន្ត្រីសួនសត្វ។ ប៉ូលិស​​និយាយ​ថា បុរស​ទាំង​ពីរ​ត្រូវ​ប្រឈម​នឹង​ការ​ចោទ​ប្រកាន់​ពី​បទ​បំពាន​អាជីវកម្ម តែ​ពួក​គេ​បដិសេធ។ ប៉ូលិសបន្ថែមថា ដំបូង​ឡើយអ្នកទាំងពីរនាក់ ​​ព្យាយាម​កុហក​ប៉ូលិស​អំពី​ឈ្មោះ​របស់ពួកគេ។

ការចាប់ខ្លួនបានកើតឡើង បន្ទាប់ពីភ្ញៀវទេសចរក្នុងស្រុក និងអន្តរជាតិកាន់តែច្រើន សម្រុកទៅលេងសួនសត្វមួយនេះ ដោយសារតែភាពល្បីល្បាញរបស់កូនស្វា Punch។ Punch ក្លាយជាតារាអ៉ីនធឺណេតក្នុងឆ្នាំនេះ បន្ទាប់ពីសួនសត្វបានបង្ហោះវីដេអូមួយដែលគេឃើញ Punch លេងជាមួយតុក្កតារូបស្វា IKEA plush orangutan បន្ទាប់ពីត្រូវមេស្វាបោះបង់ចោល។