(ប៉េកាំង)៖ នាថ្ងៃពុធ ទី២០ ខែឧសភា ឆ្នាំ២០២៦ ពោលគឺត្រឹមប៉ុន្មានថ្ងៃបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានបំពេញទស្សនកិច្ចមកកាន់ប្រទេសចិន ក្រសួងពាណិជ្ជកម្មចិន បានប្រកាសថា ទីក្រុងប៉េកាំងនឹងធ្វើការជាមួយទីក្រុងវ៉ាស៉ីនតោន ដើម្បីកាត់បន្ថយអត្រាពន្ធគយ ដែលប៉ះពាល់ទំនិញតម្លៃរាប់សិបពាន់លានដុល្លារ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្រសួងពាណិជ្ជកម្មចិន បាននិយាយថា ក្រោយជំនួបកំពូលរវាងលោក ត្រាំ និងប្រធានាធិបតីចិន លោក ស៉ី ជីនពីង កាលពីសប្តាហ៍មុន ភាគីទាំងពីរបានឯកភាពគ្នាធ្វើការ ដើម្បីបន្ធូរបន្ថយពន្ធគយបដិការលើផលិតផលក្នុងទំហំស្មើគ្នា។ បើតាមក្រសួងពាណិជ្ជកម្ម អត្រាពន្ធដែលមានបំណងកាត់បន្ថយនោះ នឹងប៉ះពាល់លើទំនិញមានតម្លៃសរុបយ៉ាងហោច ៣០ពាន់លានដុល្លារ សម្រាប់ភាគីម្ខាងៗ។

ទីក្រុងប៉េកាំង បានបង្ហាញក្តីសង្ឃឹមថា ខាងភាគីអាមេរិកនឹងគោរពពាក្យសន្យារបស់ខ្លួន ហើយអំពាវនាវឱ្យមានការបន្តសុពលភាព ចំពោះ​កិច្ចព្រមព្រៀងផ្អាកជម្លោះពាណិជ្ជកម្ម ដែលសម្រេចបានកាលពីឆ្នាំ២០២៥។

គួរបញ្ជាក់ថា កាលពីក្នុងឆ្នាំ២០២៥ កំពូលមហាអំណាចសេដ្ឋកិច្ចពិភពលោកទាំងពីរ បានចំណាយពេលភាគច្រើនជាប់ផុងក្នុងសង្រ្គាមពាណិជ្ជកម្ម ដែលបានកើនឡើងកម្តៅយ៉ាងក្តៅគគុក រហូតទាល់តែមេដឹកនាំប្រទេសទាំងពីរ បានឈានដល់ការព្រមព្រៀងផ្អាកជម្លោះសេដ្ឋកិច្ចនោះ ​រយៈពេល១ឆ្នាំ អំឡុងជំនួបនៅកូរ៉េខាងត្បូងកាលពីខែតុលា៕