(ម៉ានីល)៖ នាថ្ងៃពុធ ទី២០ ខែឧសភា ឆ្នាំ២០២៦ តុលាការកំពូលនៃប្រទេសហ្វីលីពីន បានច្រានចោលសំណើរបស់សមាជិកព្រឹទ្ធសភា លោក Ronald dela Rosa ដែលចង់ឱ្យតុលាការចេញបញ្ជាហាមឃាត់បណ្តោះអាសន្ន ដើម្បីរារាំងការចាប់ខ្លួននិងផ្ទេររូបលោក ទៅកាន់តុលាការព្រហ្មទណ្ឌអន្តរជាតិ ICC។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Dela Rosa ត្រូវបានតុលាការ ICC ចេញដីកាចាប់ខ្លួន ពីបទឧក្រិដ្ឋកម្មប្រឆាំងមនុស្ស ជុំវិញតួនាទីរបស់លោក ក្នុងយុទ្ធនាការសង្រ្គាមគ្រឿងញៀនដ៏បង្ហូរឈាម អំឡុងអាណត្តិកាន់អំណាចឆ្នាំ២០១៦-២០២២ របស់អតីតប្រធានាធិបតីហ្វីលីពីន លោក Rodrigo Duterte។ លោក Dela Rosa បានបដិសេធជាប់ពាក់ព័ន្ធ ក្នុងការសម្លាប់ដែលខុសច្បាប់។​ រូបលោកគឺជា​អតីតមេប៉ូលិសជាតិហ្វីលីពីន និងជាអ្នកទទួលបន្ទុកដឹកនាំសង្រ្គាមគ្រឿងញៀនរបស់លោក ​Duterte។

កាលពីសប្តាហ៍មុន អាជ្ញាធរហ្វីលីពីន បានបញ្ជាក់ថា ពួកគេមានបំណងអនុវត្តតាមដីការបស់ ICC ចាប់ខ្លួនលោក Dela Rosa។ សេចក្តីសម្រេចដូចខាងលើរបស់តុលាការកំពូល គឺជាស្ថានការណ៍វិវត្តន៍ថ្មីចុងក្រោយ ក្នុងសាច់រឿងមួយដែលបានអង្រួនហ្វីលីពីន ចាប់តាំងតែពីដើម​សប្តាហ៍មុន ហើយបើកផ្លូវដល់ការចាប់ខ្លួនរូបលោក។

លោក Dela Rosa បានលេចមុខក្រោយសំងំលាក់ខ្លួនរយៈពេល៦ខែ ហើយទៅជ្រកកោននៅក្នុងព្រឹទ្ធសភាអស់រយៈពេលប៉ុន្មានថ្ងៃ មុនពេលលួចរត់ចេញទៅវិញបាត់​ កាលពីវេលារំលងអធ្រាត្រឈានចូលថ្ងៃទី១៤ ខែឧសភា ក្រោយយប់មុននោះកើតមានចលាចល និងការផ្ទុះស្នូរកាំភ្លើង បន្ទាប់ពីលោកបានអំពាវនាវសុំការជួយ និងអះអាងថា ខ្លួននឹងត្រូវអាជ្ញាធរចាប់ក្នុងពេលឆាប់ៗ។ ឥឡូវនេះ គេមិនដឹងច្បាស់ថា រូបលោកស្ថិតនៅទីណាទេ។

គួរបញ្ជាក់ថា​ យុទ្ធនាការសង្រ្គាមគ្រឿងញៀនរបស់លោក Duterte ដែលមានលោក Dela Rosa ជាអ្នកដឹកនាំចម្បង បានសម្លាប់​មនុស្សរាប់ពាន់នាក់ ក្នុងប្រតិបត្តិការបង្រ្កាបរបស់ប៉ូលិស។ លោក Duterte ត្រូវបានចាប់ខ្លួននៅហ្វីលីពីន កាលពីខែមីនា ឆ្នាំ២០២៥ ហើយបច្ចុប្បន្ន កំពុងស្ថិតនៅមន្ទីរឃុំឃាំងរបស់តុលាការ ICC នៅទីក្រុងឡាអេប្រទេសហូឡង់។ លោក Duterte នឹងត្រូវជំនុំជម្រះក្តីក្រោមបទចោទប្រកាន់ឧក្រិដ្ឋកម្មប្រឆាំងមនុស្សជាតិ ខណៈលោកនៅតែប្រកាន់ជំហរថា រូបលោកមិនបានប្រព្រឹត្តខុសអ្វីទាំងអស់៕