(ម៉ូស្គូ)៖ ប្រទេសរុស្ស៊ី និងចិន នៅថ្ងៃពុធនេះបានរិះគន់គម្រោងខែលការពារមីស៊ីល Golden Dome របស់ប្រធានាធិបតីអាមេរិក លោក ដូណាល់ ត្រាំ ដោយចាត់ទុកថាជាការគំរាមកំហែងដល់ស្ថិរភាពយុទ្ធសាស្ត្រ។ ប្រទេសទាំងពីរក៏បានចោទប្រកាន់ទីក្រុងវ៉ាស៊ីនតោនថា គ្មានការទទួលខុសត្រូវដែលមិនព្រមរៀបចំសន្ធិសញ្ញានុយក្លេអ៊ែរថ្មី ជំនួសសន្ធិសញ្ញាចាស់ដែលផុតកំណត់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

សេចក្តីថ្លែងការណ៍រួមនេះ ត្រូវបានធ្វើឡើងក្នុងអំឡុងពេលដែលប្រធានាធិបតីចិន លោក ស៊ី ជិនពីង ទទួលស្វាគមន៍យ៉ាងកក់ក្តៅចំពោះប្រធានាធិបតីរុស្ស៊ី លោក វ្ល៉ាឌីមៀ ពូទីន នៅទីក្រុងប៉េកាំង។ គម្រោង Golden Dome របស់អាមេរិក គឺជាផែនការពង្រីកប្រព័ន្ធការពារលើដី រួមមានមីស៊ីលស្ទាក់ចាប់ និងប្រព័ន្ធរ៉ាដា ព្រមទាំងការបន្ថែមបច្ចេកវិទ្យាអាវុធក្នុងលំហអវកាស ដែលមានសមត្ថភាពតាមដាន និងបាញ់ទម្លាក់រាល់មីស៊ីលដែលគំរាមកំហែងពីគន្លងតារាវិថី។

ចិន និងរុស្ស៊ីបានសង្កត់ធ្ងន់ថា គម្រោងសាងសង់ប្រព័ន្ធការពារមីស៊ីលពហុកម្រិតគ្មានដែនកំណត់របស់អាមេរិកនេះ គឺជាការគំរាមកំហែងយ៉ាងច្បាស់លាស់ ដែលផ្ទុយស្រឡះពីគោលការណ៍នៃរក្សាស្ថិរភាពយុទ្ធសាស្ត្រពិភពលោក។ ក្រៅពីនេះ ប្រទេសមហាអំណាចទាំងពីរ ក៏បានសម្តែងការសោកស្តាយចំពោះអាមេរិក ដែលបណ្តោយឱ្យសន្ធិសញ្ញាគ្រប់គ្រងអាវុធ New START ឆ្នាំ២០១០ ផុតកំណត់ដោយគ្មានកិច្ចព្រមព្រៀងថ្មីមកជំនួសផងដែរ។

ទន្ទឹមនឹងការរិះគន់នេះ រុស្ស៊ី និងចិន ក៏បានព្រមានរួមគ្នាថា ផែនការដាក់ពង្រាយមីស៊ីលរយៈចម្ងាយខ្លី និងមធ្យម ព្រមទាំងការប៉ុនប៉ងវាយប្រហារជាមុនពីសំណាក់ប្រទេសណាមួយ ដើម្បីផ្តាច់ក្បាលសត្រូវ គឺជាទង្វើបង្កអស្ថិរភាព និងការគំរាមកំហែងដល់សន្តិសុខសកលលោកយ៉ាងធ្ងន់ធ្ងរ៕