(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃពុធនេះបានប្រកាសថា លោកនឹងជួបសន្ទនាជាមួយប្រធានាធិបតីតៃវ៉ាន់ លោក ឡៃ ឈីងតេ ក្នុងពេលខាងមុខ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក ត្រាំ បានប្រាប់ក្រុមអ្នកសារព័ត៌មានយ៉ាងដូច្នេះថា «ខ្ញុំនឹងនិយាយជាមួយគាត់។ ខ្ញុំនិយាយជាមួយមនុស្សគ្រប់គ្នា...យើងនឹងធ្វើការងាររួមគ្នាលើបញ្ហាតៃវ៉ាន់នេះ»។ ការបង្ហាញជំហរសម្រាប់ការសន្ទនានេះ ធ្វើឡើងបន្ទាប់ពីលោក ត្រាំ ទើបតែបញ្ចប់ដំណើរទស្សនកិច្ចនៅក្នុងប្រទេសចិន កាលពីសប្តាហ៍មុន។

ការសន្ទនារវាងមេដឹកនាំអាមេរិក និងតៃវ៉ាន់ នឹងក្លាយជាព្រឹត្តិការណ៍ការទូតដ៏សំខាន់ជាប្រវត្តិសាស្ត្រមួយ ដោយសារតែប្រធានាធិបតីនៃប្រទេសទាំងពីរមិនដែលបានជជែកគ្នាដោយផ្ទាល់នោះទេ ចាប់តាំងពីទីក្រុងវ៉ាស៊ីនតោន បានបង្វែរការទទួលស្គាល់ការទូតពីទីក្រុងតៃប៉ិ ទៅកាន់ទីក្រុងប៉េកាំងកាលពីឆ្នាំ១៩៧៩ មកម្ល៉េះ។ ជំនួបសន្ទនាដោយផ្ទាល់នេះ ក៏ត្រូវបានគេរំពឹងថានឹងបង្កកំហឹងយ៉ាងខ្លាំងដល់ប្រទេសចិន ដែលតែងតែចាត់ទុកកោះតៃវ៉ាន់ថាជាផ្នែកមួយនៃទឹកដីរបស់ខ្លួន។

គួរបញ្ជាក់ថា ក្រោយជំនួបជាមួយប្រធានាធិបតីចិន លោក ស៊ី ជិនពីង កាលពីសប្តាហ៍មុន លោក ត្រាំ ធ្លាប់បានបញ្ជាក់ថា លោកមិនទាន់សម្រេចចិត្តថានឹងបន្តការលក់អាវុធតម្លៃ ១៤ពាន់លានដុល្លារឱ្យតៃវ៉ាន់ ឬយ៉ាងណានោះទេ។ ទោះជាយ៉ាងណា យោងតាមច្បាប់របស់សហរដ្ឋអាមេរិក ទីក្រុងវ៉ាស៊ីនតោនមានកាតព្វកិច្ចក្នុងការផ្តល់មធ្យោបាយការពារខ្លួនដល់កោះតៃវ៉ាន់ ខណៈដែលសមាជិកសភាអាមេរិកមកពីគណបក្សទាំងពីរ ក៏បានអំពាវនាវឱ្យរដ្ឋបាលលោក ត្រាំ បន្តការលក់អាវុធនេះផងដែរ៕