(AFP)៖ សហរដ្ឋអាមេរិក កាលពីថ្ងៃពុធ ទី២០ ខែឧសភា ឆ្នាំ២០២៦ បានចោទប្រកាន់ពីបទព្រហ្មទណ្ឌប្រឆាំងនឹងអតីតប្រធានាធិបតីគុយបា លោក Raul Castro ខណៈទីក្រុងវ៉ាស៊ីនតោនអំពាវនាវឱ្យប្រជាជនគុយបាបោះជំហានទៅរកប្រព័ន្ធដឹកនាំថ្មីមួយ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP​។

ការចោទប្រកាន់ខាងលើ ត្រូវបានរដ្ឋអាជ្ញាអាមេរិកប្រកាសជាផ្លូវការក្នុងតុលាការសហព័ន្ធមួយនៅរដ្ឋ Florida ជាមួយការចោទប្រកាន់លោក Raul Castro ជុំវិញតួនាទីពាក់ព័ន្ធនឹងការបាញ់ទម្លាក់យន្ដហោះស៊ីវិល ២គ្រឿងកាលពីឆ្នាំ១៩៩៦ សម្លាប់មនុស្ស៤នាក់ ក្នុងមានពលរដ្ឋអាមេរិក៣នាក់។ លោក Raul Castro មានអាយុ៩៤ឆ្នាំ និងជាប្អូនបង្កើតលោក Fidel Castro ដែលជាសត្រូវដ៏ជូរចត់ម្នាក់របស់សហរដ្ឋអាមេរិកអំឡុងសម័យសង្រ្គាមត្រជាក់ ត្រូវបានចោទប្រកាន់ពីបទឃាតកម្ម (អំពើសម្លាប់មនុស្សដោយចេតនា) និងសមគំនិតដើម្បីសម្លាប់ជនជាតិអាមេរិក ព្រមទាំងបំផ្លិចបំផ្លាញយន្ដហោះ។

ការចោទប្រកាន់នេះបានដុតបញ្ឆេះការសង្ស័យថាប្រធានាធិបតីអាមេរិក លោក ដូណាល់ ត្រាំ អំពីបំណងដើម្បីផ្ដួលរំលំរដ្ឋាភិបាលគុយបា។ លោក ត្រាំ កន្លងមកបានប្រើប្រាស់ការចោទប្រកាន់នៅក្នុងតុលាការអាមេរិក ដើម្បីបញ្ជាក់ពីភាពត្រឹមត្រូវនៃការប្រើប្រាស់សកម្មភាពយោធាកាលពីខែមករា ឆ្នាំ២០២៦ ដែលនាំទៅរកការផ្ដួលរំលំ និងចាប់ខ្លួនអតីតប្រធានាធិបតីវ៉េណេស៊ុយអេឡា លោក Nicolas Maduro ដែលជាសម្ព័ន្ធដ៏សំខាន់របស់រដ្ឋាភិបាលគុយបា។

គួរបញ្ជាក់ថា មនុស្ស ៤នាក់ ក្នុងនោះរួមមានជនជាតិអាមេរិក ៣នាក់បានស្លាប់ ក្នុងការបាញ់ទម្លាក់យន្ដហោះស៊ីវិល ២គ្រឿងកាលពីឆ្នាំ១៩៩៦ នៅក្នុង ដែនអាកាសស្ថិតនៅក្បែរប្រទេសគុយបា ដែលធ្វើឱ្យទំនាក់ទំនងរវាងសហរដ្ឋអាមេរិក និងគុយបាធ្លាក់ចុះដុនដាបយ៉ាងខ្លាំង។ ក្នុងពេលដែលទំនាក់ទំនងរវាង ប្រទេសកំពុងតានតឹង លោក ត្រាំ បានឱ្យសញ្ញាម្ដងហើយម្ដងទៀតថារដ្ឋាភិបាលគុយបាអាចនឹងក្លាយជាគោលដៅបន្ទាប់ ក្រោយការដួលរលំនៃរដ្ឋាភិបាលវ៉េណេស៊ុយអេឡា។

កាលពីដើមខែឧសភានេះ លោកថែមទាំងបានព្រមានទៀតផងថាទីក្រុងវ៉ាស៊ីនតោនអាចនឹងគ្រប់គ្រងលើ គុយបាដែលស្ថិតនៅចម្ងាយប្រហែល ១៤៥គីឡូម៉ែត្រពីរដ្ឋ Florida ក្នុងពេលដ៏ខ្លីខាងមុខ៕