(ហ្សាការតា)៖ យោធាឥណ្ឌូណេស៊ី នៅថ្ងៃព្រហស្បតិ៍ ទី២១ ខែឧសភា ឆ្នាំ២០២៦ បាននិយាយថាក្រុមឧទ្ទាមប្រដាប់អាវុធនៅក្នុងខេត្ត Papua បានសម្លាប់ជនស៊ីវិល ៨នាក់ ក្នុងតំបន់ Yahukimo។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងសេចក្ដីថ្លែងការណ៍មួយ មន្ត្រីយោធាឥណ្ឌូណេស៊ី លោក Wirya ​Arthadiguna បានថ្កោលទោសការសម្លាប់ជនស៊ីវិលទាំង៨នាក់ដែលជាកម្មករអណ្ដូងរ៉ែមាស ជាមួយ ការបន្ថែមថាប្រតិបត្តិការជម្លៀសសាកសពជនរងគ្រោះកំពុងធ្វើឡើង។ ក្រុមឧទ្ទាមផ្ដាច់ខ្លួន West ​Papua National Liberation Army (TPNPB) បានចេញមុខ ទទួលខុសត្រូវលើការសម្លាប់ខាងលើ ក្នុងសេចក្ដីថ្លែងការណ៍មួយនៅថ្ងៃព្រហស្បតិ៍នេះ ដោយអះអាងថាជនរងគ្រោះទាំងនោះ គឺជាមន្ត្រីយោធាស៊ើបការណ៍ដែលបន្លំខ្លួនជា កម្មករអណ្ដូងរ៉ែមាស។

TPNPB ក៏បានអំពាវនាវឱ្យផងដែររដ្ឋាភិបាលឥណ្ឌូណេស៊ីបញ្ឈប់ការបញ្ជូនមន្ត្រីយោធាទៅកាន់ខេត្ត Papua ដោយបន្លំខ្លួនជាកម្មកររ៉ែមាស ឬអ្នករត់តាក់ស៊ី។ ក៏ប៉ុន្តែ លោក Arthadiguna បានច្រានចោលការលើកឡើងរបស់ក្រុមឧទ្ទាម TPNPB ហើយថាអាជ្ញាធរកំពុងតាមប្រមាញ់ជនល្មើស៕