(វ៉ាស៉ីនតោន)៖ យោងតាមគេហទំព័ររបស់ក្រសួងហិរញ្ញវត្ថុអាមេរិក សហរដ្ឋអាមេរិកបានលុបឈ្មោះអ្នកជំនាញស្តីពីដែនដីប៉ាឡេស្ទីនរបស់អង្គការសហប្រជាជាតិ (UN) គឺលោកស្រី Francesca Albanese ចេញពីបញ្ជីទណ្ឌកម្មរបស់ខ្លួន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី២១ ខែឧសភា ឆ្នាំ២០២៦។

ការដកទណ្ឌកម្មនេះ កើតមានឡើងមួយសប្តាហ៍បន្ទាប់ពីចៅក្រមសហព័ន្ធអាមេរិកម្នាក់ បានរារាំងទណ្ឌកម្មលើលោកស្រី Albanese ជាបណ្តោះអាសន្ន ក្រោយរកឃើញថា រដ្ឋបាលលោក ត្រាំ ទំនងជាបានរំលោភបំពានសិទ្ធិសេរីភាពនៃការបញ្ចេញមតិរបស់លោកស្រី តាមរយៈការដាក់ទណ្ឌកម្ម បន្ទាប់ពីលោកស្រីបានរិះគន់សង្គ្រាមអ៉ីស្រាអែល ដែលជាសម្ព័ន្ធមិត្តអាមេរិក នៅតំបន់ហ្កាហ្សា។

លោកស្រី Albanese ជាមេធាវីជនជាតិអ៉ីតាលី ដែលជាអ្នករាយការណ៍ពិសេសរបស់ UN ស្តីពីដែនដីប៉ាឡេស្ទីន។ ក្នុងតួនាទីនោះ លោកស្រីបានស្នើឱ្យតុលាការព្រហ្មទណ្ឌអន្តរជាតិ បន្តការចោទប្រកាន់អ៉ីស្រាអែល និងពលរដ្ឋអាមេរិកមួយចំនួន ពីបទឧក្រិដ្ឋកម្មសង្គ្រាម។ លោកស្រីក៏បានសរសេររបាយការណ៍មួយ ដោយចោទប្រកាន់ក្រុមហ៊ុនធំៗរបស់អាមេរិកពីការគប់គិតគ្នា នៅក្នុងអ្វីដែលលោកស្រីហៅថាយុទ្ធនាការប្រល័យពូជសាសន៍ ដែលកំពុងបន្តរបស់អ៉ីស្រាអែលនៅហ្កាហ្សា៕