(ម៉ានីល)៖ នាថ្ងៃព្រហស្បតិ៍ ទី២១ ខែឧសភា ឆ្នាំ២០២៦ រដ្ឋាភិបាលនៃប្រទេសហ្វីលីពីន បានចេញបញ្ជាជាផ្លូវការឱ្យប៉ូលិស តាមស្វែងរកនិងចាប់ខ្លួនសមាជិកព្រឹទ្ធសភាម្នាក់ ដែលត្រូវបានតុលាការព្រហ្មទណ្ឌអន្តរជាតិ ICC ចេញដីកាចាប់ខ្លួនជុំវិញតួនាទី​ក្នុងយុទ្ធនាការបង្រ្កាបគ្រឿងញៀនដ៏ប្រល័យរបស់អតីតប្រធានាធិបតីហ្វីលីពីន លោក Rodrigo Duterte។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សមាជិកព្រឹទ្ធសភាខាងលើ គឺលោក Ronald Dela Rosa ដែលធ្លាប់កាន់តួនាទីជាមេប៉ូលិសជាតិហ្វីលីពីន និងជាអ្នកទទួលបន្ទុក​ដឹកនាំសង្រ្គាមបង្រ្កាបគ្រឿងញៀន ដែលបានសម្លាប់មនុស្សរាប់ពាន់នាក់ នៅក្នុងប្រទេសអាស៊ានមួយនេះ កាលពីអំឡុងអាណត្តិរបស់​លោក Duterte ឆ្នាំ២០១៦-២០២២។ លោក Dela Rosa នាពេលនេះ កំពុងរត់គេខ្លួន ក្រោយលួចចាកចេញពីអគារព្រឹទ្ធសភា ជាទីដែលលោកបានសំងំជ្រកកោនអស់រយៈពេលប៉ុន្មានថ្ងៃ។

រដ្ឋមន្រ្តីក្រសួងយុត្តិធម៌ហ្វីលីពីន លោក Fredderick Vida បានប្រាប់ក្រុមអ្នកសារព័ត៌មានថា នាពេលនេះ ស្ថាប័នអនុវត្តច្បាប់ទាំងអស់​របស់ហ្វីលីពីន គឺមានភារកិច្ចត្រូវតាមចាប់ខ្លួន លោក Ronald Dela Rosa។ ការបើកប្រតិបត្តិការចាប់ខ្លួននេះ គឺបន្ទាប់ពីតុលាការកំពូលហ្វីលីពីន កាលពីថ្ងៃពុធ បានសម្រេចបដិសេធសំណើរបស់លោក Dela Rosa ដែលចង់ឱ្យចេញដីការារាំងការចាប់ខ្លួនបណ្តោះអាសន្ន។ ប្រការនេះមានន័យថា ដីកាចាប់ខ្លួនរបស់តុលាការ ICC គឺឥឡូវអាចចាប់ផ្តើមអនុវត្តបាន។

គួរបញ្ជាក់ថា តុលាការ ICC បានបញ្ចេញដីកាចាប់ខ្លួនលោក Dela Rosa កាលពីសប្តាហ៍មុន ដោយចោទប្រកាន់រូបលោក ពីបទឧក្រិដ្ឋកម្មប្រឆាំងមនុស្សជាតិនៃអំពើឃាតកម្ម ពោលគឺដូចគ្នាទៅនឹងការចោទប្រកាន់លោក Rodrigo Duterte។ លោក Duterte ត្រូវបានចាប់ខ្លួននៅហ្វីលីពីន កាលពីខែមីនា ឆ្នាំ២០២៥ ហើយបច្ចុប្បន្នកំពុងជាប់ឃុំឃាំង នៅទីក្រុងឡាអេនៃប្រទេសហូឡង់ ដើម្បីរង់ចាំការជំនុំជម្រះក្តីរបស់ ICC ពាក់ព័ន្ធសង្រ្គាមបង្រ្កាបគ្រឿងញៀនដ៏បង្ហូរឈាមរបស់លោក៕