(ឌូបៃ)៖ ប្រភពជាន់ខ្ពស់ពីអ៊ីរ៉ង់ចំនួនពីររូប បានបង្ហើបឱ្យដឹងថា មេដឹកនាំកំពូលរបស់ប្រទេសអ៊ីរ៉ង់ លោក អាយ៉ាតូឡា ម៉ូចតាបា ខាមេណៃ បានចេញបញ្ជាណែនាំមិនឱ្យបញ្ជូនសារធាតុអ៊ុយរ៉ាញ៉ូមចម្រាញ់កម្រិតខ្ពស់ របស់ខ្លួនទៅក្រៅប្រទេសឡើយ ដែលការស

ម្រេចចិត្តនេះធ្វើឱ្យជំហររបស់ទីក្រុងហេរ៉ង់កាន់តែរឹងត្អឹង និងធ្វើឱ្យកិច្ចចរចាសន្តិភាពជួបភាពរកាំរកូសខ្លាំង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

បទបញ្ជារបស់លោក ខាមេណៃ អាចនឹងបង្កការខកចិត្តកាន់តែខ្លាំងដល់ប្រធានាធិបតីអាមេរិក លោក ដូណាល់ ត្រាំ ខណៈដែលកន្លងមក លោក ត្រាំ ធ្លាប់បានធានាអះអាងចំពោះអ៊ីស្រាអែលថា រាល់ស្តុកអ៊ុយរ៉ាញ៉ូមចម្រាញ់របស់អ៊ីរ៉ង់នឹងត្រូវបង្ខំឱ្យបញ្ជូនចេញទៅក្រៅប្រទេស ក្រោមលក្ខខណ្ឌនៃកិច្ចព្រមព្រៀងសន្តិភាព។

ដោយឡែក នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ ក៏បានប្រកាសយ៉ាងម៉ឺងម៉ាត់ផងដែរថា ខ្លួននឹងមិនចាត់ទុកសង្គ្រាមនេះថាបានបញ្ចប់ឡើយ ដរាបណាសារធាតុអ៊ុយរ៉ាញ៉ូមមិនត្រូវបានដកចេញពីអ៊ីរ៉ង់ ហើយសមត្ថភាពមីស៊ីលរបស់ប្រទេសនេះមិនត្រូវបានកម្ទេចចោលទេនោះ។

ទោះជាយ៉ាងណា ប្រភពពីអ៊ីរ៉ង់បានបញ្ជាក់ក្នុងលក្ខខណ្ឌមិនបញ្ចេញឈ្មោះថា មេដឹកនាំកំពូល និងរដ្ឋបាលយោធាអ៊ីរ៉ង់ មានការឯកភាពគ្នាយ៉ាងមុតមាំថា សារធាតុអ៊ុយរ៉ាញ៉ូមចម្រាញ់កម្រិត ៦០ភាគរយ (ដែលជិតដល់កម្រិត ៩០ភាគរយសម្រាប់ផលិតអាវុធ) ត្រូវតែរក្សាទុកក្នុងប្រទេស ព្រោះពួកគេជឿជាក់ថាការបញ្ជូនវាទៅក្រៅប្រទេស នឹងធ្វើឱ្យអ៊ីរ៉ង់កាន់តែងាយរងគ្រោះចំពោះការវាយប្រហារនាពេលអនាគតពីសំណាក់អាមេរិក និងអ៊ីស្រាអែល៕