(ហ្ស៊េរុយសាឡឹម)៖ ប្រទេសអ៊ីស្រាអែល នៅថ្ងៃព្រហស្បតិ៍ បានប្រកាសថា ខ្លួនបានបណ្ដេញសកម្មជនបរទេសទាំងអស់ ដែលត្រូវបានចាប់ខ្លួនពីលើកប៉ាល់ធ្វើដំណើរឆ្ពោះទៅកាន់តំបន់ហ្គាហ្សាចេញពីប្រទេសវិញហើយ បន្ទាប់ពីមានការរិះគន់យ៉ាងខ្លាំងពីអន្តរជាតិជុំវិញការធ្វើបាបពួកគេនៅក្នុងមន្ទីរឃុំឃាំង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

សកម្មជនជាង ៤៣០នាក់ មកពីបណ្ដាប្រទេសនានាជុំវិញពិភពលោក ត្រូវបានចាប់ខ្លួន និងឃុំខ្លួននៅក្នុងពន្ធនាគារ Ktziot របស់អ៊ីស្រាអែល កាលពីថ្ងៃចន្ទ បន្ទាប់ពីកងទ័ពជើងទឹកអ៊ីស្រាអែលបានស្ទាក់ចាប់កប៉ាល់របស់ពួកគេ ដែលព្យាយាមបំបែកការបិទខ្ទប់ដែនទឹកហ្គាហ្សា។ ភាពចម្រូងចម្រាសបានផ្ទុះឡើង កាលពីថ្ងៃពុធ បន្ទាប់ពីរដ្ឋមន្ត្រីសន្តិសុខជាតិស្តាំនិយមជ្រុលរបស់អ៊ីស្រាអែល លោក អ៊ីតាម៉ា បេន ហ្គីវៀ (Itamar Ben Gvir) បានបង្ហោះវីដេអូបង្ហាញពីសកម្មភាពសកម្មជនទាំងនោះត្រូវបានចងដៃ និងបង្ខំឱ្យឱនក្បាលដល់ដី ដែលបង្កឱ្យមានការថ្កោលទោស និងប្រតិកម្មការទូតយ៉ាងខ្លាំងក្លា។

អ្នកនាំពាក្យក្រសួងការបរទេសអ៊ីស្រាអែល បានបញ្ជាក់ថា សកម្មជនបរទេសទាំងអស់ត្រូវបានបណ្ដេញចេញរួចរាល់ហើយ ដោយអ៊ីស្រាអែលនឹងមិនអនុញ្ញាតឱ្យមានការបំពានណាមួយលើវិធានការបិទខ្ទប់ដែនទឹកលើហ្គាហ្សាឡើយ។ មជ្ឈមណ្ឌលច្បាប់ Adalah ដែលតំណាងឱ្យក្រុមសកម្មជន បានឱ្យដឹងថា សកម្មជនភាគច្រើនត្រូវបានបណ្ដេញចេញតាមរយៈព្រលានយន្តហោះ Ramon ភាគខាងត្បូងអ៊ីស្រាអែល ដោយក្នុងនោះប្រទេសតួកគី បានបញ្ជូនយន្តហោះពិសេសដើម្បីដឹកពលរដ្ឋខ្លួន និងសកម្មជនដទៃទៀត ខណៈសកម្មជនអេហ្ស៊ីប និងហ្សកដានី ត្រូវបានបញ្ជូនត្រឡប់ទៅវិញតាមច្រកព្រំដែនគោកជិតខាងរៀងៗខ្លួន៕