(វ៉ាស៊ីនតោន)៖ កាសែតអាមេរិក Washington Post កាលពីថ្ងៃព្រហស្បតិ៍ ទី២១ ខែឧសភា ឆ្នាំ២០២៦ បានរាយការណ៍ថាសហរដ្ឋអាមេរិកបានប្រើប្រាស់គ្រាប់មីស៊ីល ដើម្បីការពារអ៉ីស្រាអែល ច្រើនជាងកងកម្លាំងអ៉ីស្រាអែលខ្លួនឯងបានប្រើទៅទៀត អំឡុងសង្រ្គាមជាមួយអ៉ីរ៉ង់។

Washington Post ធ្វើសេចក្ដីរាយការណ៍បែបនេះ ដោយផ្អែកលើរបាយការណ៍វាយតម្លៃរបស់ក្រសួងការពារជាតិអាមេរិក ដែលបានគូសបញ្ជាក់ថាស្ដុកគ្រាប់មីស៊ីលទំនើបៗ របស់សហរដ្ឋអាមេរិកបានថយចុះគួរឱ្យកត់សម្គាល់ បន្ទាប់ពីយោធាអាមេរិកបានប្រើប្រាស់គ្រាប់មីស៊ីលទាំងនោះដើម្បីការពារអ៉ីស្រាអែល ច្រើនជាងកងកម្លាំងអ៉ីស្រាអែល ខ្លួនឯងបានប្រើអំឡុងសង្រ្គាមជាមួយអ៉ីរ៉ង់។ តាមរបាយការណ៍វាយតម្លៃដដែល សហរដ្ឋអាមេរិកបានប្រើប្រាស់គ្រាប់មីស៊ីលនៃប្រព័ន្ធខែលប្រឆាំងមីស៊ីល THAAD ច្រើនជាង ២០០គ្រាប់ ដើម្បីការពារអ៉ីស្រាអែល ឬស្មើជិតពាក់កណ្ដាលនៃស្ដុកសរុបរបស់មន្ទីរបញ្ចកោណ។

មិនតែប៉ុណ្ណោះ សហរដ្ឋអាមេរិក ក៏បានបាញ់គ្រាប់មីស៊ីល Standard Missile-3 និង Standard Missile-6 ជាង១០០គ្រាប់ផងដែរ ចេញពីនាវាចម្បាំងអាមេរិក ក្នុងតំបន់សមុទ្រមេឌីទែររ៉ាណេភាគខាងកើត ធៀបទៅនឹងអ៉ីស្រាអែលដែលបានប្រើប្រាស់មីស៊ីលនៃប្រព័ន្ធខែលប្រឆាំងមីស៊ីល Arrow តិចជាង១០០គ្រាប់ និងគ្រាប់មីស៊ីល នៃប្រព័ន្ធខែលប្រឆាំងមីស៊ីល David’s Sling ប្រហែល៩០គ្រាប់។ ក្នុងនោះទៀតសោត គ្រាប់មីស៊ីលមួយចំនួនដែលអ៉ីស្រាអែលបានប្រើ គឺបាញ់ស្កាត់ទម្លាក់ត្រឹមគ្រាប់រ៉ុក្កែត បាញ់ដោយក្រុមឧទ្ទាមហ៊ូទីគាំទ្រដោយអ៉ីរ៉ង់ក្នុងប្រទេសយេម៉ែន និងក្រុមហេសបូឡានៅលីបង់តែប៉ុណ្ណោះ។

មន្ត្រីអាមេរិកម្នាក់ក៏បានប្រាប់ Washington Post ដែរថាប្រសិនបើ សង្រ្គាមរបស់សហរដ្ឋអាមេរិក និងអ៉ីស្រាអែលជាមួយអ៉ីរ៉ង់ផ្ទុះឡើងសាជាថ្មី នោះសហរដ្ឋអាមេរិកអាច នឹងត្រូវប្រើប្រាស់គ្រាប់មីស៊ីលកាន់តែច្រើនជាងមុនទៅទៀត៕