(មូស្គូ)៖ ប្រធានាធិបតីបេឡារុស លោក Alexander Lukashenko កាលពីថ្ងៃព្រហស្បតិ៍ ទី២១ ខែឧសភា ឆ្នាំ២០២៦ បានច្រានចោលការលើកឡើងដែលថាបេឡារុសនឹង ប្រឡូកចូលក្នុងសង្រ្គាមអ៊ុយក្រែន ប៉ុន្តែបាននិយាយថាបេឡារុសនឹងចូលរួមជាមួយរុស្ស៉ីដើម្បីការពារខ្លួនឯង ក្នុងករណីមានការឈ្លានពានណាមួយ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters។

ត្រូវបានដកស្រង់សម្ដីដោយប្រព័ន្ធផ្សព្វផ្សាយរដ្ឋបេឡារុស BELTA លោក Lukashenko ក៏បានបញ្ជាក់ដែរថារូបលោកត្រៀមខ្លួនជាស្រេច ដើម្បីជួបប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ដែលបានអះអាងម្ដងហើយម្ដងទៀតថាបេឡារុសអាចនឹងចូលរួមកាន់តែសកម្មក្នុងសង្រ្គាមរបស់រុស្ស៉ីប្រឆាំងអ៊ុយក្រែនដែលអូសបន្លាយពេលជាង ៤ឆ្នាំមកនេះ។

លោក Lukashenko ធ្វើការកត់សម្គាល់ខាងលើអំឡុងចូលរួមសមយុទ្ធនុយក្លេអ៊ែរជាមួយរុស្ស៉ី ដែលក្នុងនោះរូបលោកផ្ទាល់ និងប្រធានាធិបតីរុស្ស៉ី លោក វ្ល៉ាឌីមៀ ពូទីនបានត្រួតពិនិត្យ ការធ្វើសមយុទ្ធនេះតាមរយៈវីដេអូខុនហ្វេរិន។ «ពាក់ព័ន្ធនឹងសេចក្ដីថ្លែងការណ៍របស់លោក ហ្សេលេនស្គី ដែលថាបេឡារុសនឹងចូលរួមក្នុងសង្រ្គាម ខ្ញុំសូមបញ្ជាក់ថារឿងបែបនេះនឹង កើតឡើង លុះត្រាតែមានការឈ្លានពានណាមួយប្រឆាំងនឹងប្រទេសរបស់យើង...យើងនឹងរួមដៃគ្នាជាមួយរុស្ស៉ីដើម្បីការពារខ្លួនឯង។ នេះជាការគូសបញ្ជាក់របស់លោក Lukashenko។

លោក Lukashenko បានបន្ថែមទៀតថាប្រសិនបើលោក ហ្សេលេនស្គី ចង់បានកិច្ចពិភាក្សា លោកបានត្រៀមខ្លួនជាស្រេចដើម្បីចូលរួម មិនថាកិច្ចពិភាក្សានោះធ្វើឡើងនៅអ៊ុយក្រែន បេឡារុស ឬនៅណានោះទេ សំដៅពិភាក្សាពីបញ្ហាទំនាក់ទំនងរវាងប្រទេសទាំង២។

គួរបញ្ជាក់ថា បេឡារុសបានអនុញ្ញាតឱ្យកងទ័ពរុស្ស៉ីប្រើប្រាស់ទឹកដីរបស់ខ្លួន ដើម្បីបើកការឈ្លានពានប្រឆាំងអ៊ុយក្រែនកាលពីខែកុម្ភៈ ឆ្នាំ២០២២ ហើយលោក ហ្សេលេនស្គីជាច្រើន សប្ដាហ៍មកនេះបានព្រមានពីការកើនឡើងសកម្មភាពមិនប្រក្រតី និងលទ្ធភាពនៃការវាយប្រហារចេញពីទឹកដីបេឡារុស។ លោក ហ្សេលេនស្គីកាលពីថ្ងៃព្រហស្បតិ៍ បានបើកពិភាក្សាពី ការពង្រឹងព្រំដែនជាប់បេឡារុស ជាមួយក្រុមមន្ត្រីរបស់លោក។ លោក Lukashenko និងបេឡារុសបានក្លាយជាកម្មវត្ថុនៃការដាក់ទណ្ឌកម្មរបស់លោកខាងលិចជាច្រើនឆ្នាំមកហើយ ជុំវិញការរំលោភបំពានសិទ្ធិមនុស្ស និងការផ្ដល់ការគាំទ្រដល់សង្រ្គាមរបស់រុស្ស៉ីប្រឆាំងអ៊ុយក្រែន។

ប៉ុន្តែ សហរដ្ឋអាមេរិកនៅក្រោមអាណត្តិទី២ របស់លោកប្រធានាធិបតី ដូណាល់ ត្រាំ បានបើកកិច្ចពិភាក្សាជាច្រើនជុំជាមួយបេឡារុស ដែលបាននាំទៅរកការដោះលែង អ្នកទោសនយោបាយរាប់រយនាក់ ជាថ្នូរទៅនឹងការបន្ធូរបន្ថយទណ្ឌកម្មមួយចំនួន។ មិនតែប៉ុណ្ណោះ បេសកជនអាមេរិក លោក John Coale ថែមទាំងបានបង្ហើបឱ្យដឹងទៀតផងថា លោក Lukashenko ប្រហែលជាអាចធ្វើទស្សនកិច្ចទៅកាន់សហរដ្ឋអាមេរិកក្នុងពេលឆាប់ៗខាងមុខ៕