(ឡុងដ៏)៖ ប្រធានទីភ្នាក់ងារថាមពលអន្តរជាតិ (IEA) លោក Fatih Birol បានព្រមានថា ទីផ្សារប្រេងពិភពលោកនឹងចូលទៅក្នុង «តំបន់ក្រហម Red Zone» អំឡុងរដូវក្តៅនៅខែកក្កដា ឬខែសីហាខាងមុខ ប្រសិនបើគ្មានដំណោះស្រាយ បិទបញ្ចប់សង្រ្គាមមជ្ឈិមបូព៌ាទាំងស្រុងទេនោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃសុក្រ ទី២២ ខែឧសភា ឆ្នាំ២០២៦។

នៅឯវេទិកាអ្នកវិភាគរបស់វិទ្យាស្ថាន Chatham House ទីក្រុងឡុងដ៏ លោក Birol បាននិយាយថា ស្របពេលអតិរេកប្រេងក្នុងទីផ្សារ​ មុនពេលមានសង្រ្គាមបានជួយទប់ទល់ផលរំខានផ្នែកថាមពលក៏ដោយ ស្តុកប្រេងនាពេលនេះ កំពុងតែថមថយ។ វា​ក៏នឹង​ត្រូវ​ការ​ពេល​ច្រើន​ដើម្បីធ្វើឱ្យ​ផលិតកម្ម ក៏ដូចជា​សមត្ថភាព​ចម្រាញ់​ អាច​ត្រឡប់​ទៅ​កម្រិត​មុន​សង្គ្រាម​វិញ។ នេះជាការបន្ថែមរបស់លោក Birol។

គួរបញ្ជាក់ថា ជាការសងសឹកចំពោះការវាយប្រហាររបស់សហរដ្ឋអាមេរិក និងអ៉ីស្រាអែលដែលផ្ទុះឡើងកាលពីចុងខែកុម្ភៈ អ៉ីរ៉ង់បានបញ្ឈប់ចរាចរណ៍នាវាដឹកប្រេង ឆ្លងកាត់ច្រកសមុទ្រ Hormuz ធ្វើឱ្យស្ទះចរាចរណ៍ប្រេង និងឧស្ម័ន ជំរុញឱ្យតម្លៃកើនឡើងខ្ពស់។ បទឈប់បាញ់ថ្ងៃទី៨ ខែមេសា បានបញ្ឈប់សង្គ្រាមក៏ពិតមែន ប៉ុន្តែរហូតមកដល់ពេលនេះ ការចរចារកកិច្ចព្រមព្រៀងសន្តិភាពយូរអង្វែង បានបរាជ័យ ដែលកំពុងដាក់បន្ទុកលើសេដ្ឋកិច្ចពិភពលោក៕