(វ៉ាស៉ីនតោន)៖ កាលពីថ្ងៃព្រហស្បតិ៍ ទី២១ ខែឧសភា ឆ្នាំ២០២៦ រដ្ឋមន្រ្តីការបរទេសអាមេរិក លោក ​Marco Rubio បានឱ្យដឹងថា ប្រធានាធិបតីស្តីទីវ៉េណេស៊ុយអេឡា លោកស្រី Delcy Rodriguez នឹងធ្វើដំណើរទៅកាន់ប្រទេសឥណ្ឌា នាសប្តាហ៍ក្រោយ ដើម្បីពិភាក្សាអំពីការលក់ប្រេង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

វាគឺជាសេចក្តីប្រកាសខុសពីធម្មតាមួយ ដែលបង្ហាញឱ្យឃើញពីឥទ្ធិពលរបស់សហរដ្ឋអាមេរិក​ លើប្រទេសវ៉េណេស៊ុយអេឡា ចាប់តាំងពី​យោធាអាមេរិកបានចាប់ខ្លួនប្រធានាធិបតី លោក Nicolas Maduro កាលពីខែមករា។ លោក Rubio បានលើកអំពីគម្រោងទស្សនកិច្ចរបស់លោកស្រី Delcy ស្របពេលដែលរូបលោកផ្ទាល់ ត្រូវធ្វើដំណើរចេញក្រៅប្រទេស ក្នុងទស្សនកិច្ចមួយ ដែលនឹងនាំលោកទៅដល់ប្រទេសឥណ្ឌា ចាប់ផ្តើមពីថ្ងៃសៅរ៍ចុងសប្តាហ៍នេះ។

លោកស្រី Delcy ដែលមុនក្លាយជាប្រធានាធិបតីស្តីទី មានតួនាទីជាអនុប្រធានាធិបតីរបស់លោក Maduro ទទួលបានការកោតសរសើរពី​ប្រធានាធិបតីអាមេរិក លោក ដូណាល់ ត្រាំ សម្រាប់ការធ្វើកិច្ចសហប្រតិបត្តិការជាមួយសហរដ្ឋអាមេរិក ជាពិសេសការបើកទូលាយវិស័យប្រេង។ វ៉េណេស៊ុយអេឡា គឺជាប្រទេសដែលមានធនធានប្រេងបម្រុងក្រោមដី ច្រើនជាងគេបង្អស់លើលោក។

ដោយឡែក ឥណ្ឌាគឺជាប្រទេសនាំចូលថាមពលជិតពាក់កណ្តាល នៃតម្រូវការថាមពលទាំងអស់របស់ខ្លួន ក្នុងនោះភាគច្រើនគឺប្រេង។ ឥណ្ឌាគឺជាអតិថិជនធំមួយនៃប្រេងអ៉ីរ៉ង់ រហូតទាល់តែនៅពេលលោក ត្រាំ កាលពីអំឡុងអាណត្តិទី១ បានគំរាមដាក់ទណ្ឌកម្មប្រឆាំងប្រទេសទាំងឡាយណា ដែលទិញប្រេងពីប្រទេសអ៉ីរ៉ង់៕