(វ៉ាស៉ីនតោន)៖ កាលពីថ្ងៃព្រហស្បតិ៍ ទី២១ ខែឧសភា ឆ្នាំ២០២៦ ប្រធានាធិបតីអាមេរិក លោក ដូណាល់ ត្រាំ បានបន្តបង្កើនសម្ពាធ​លើតុលាការកំពូល ដោយនិយាយថា វានឹងជារឿងដ៏អាម៉ាស់មួយ ប្រសិនបើក្រុមចៅក្រមនៃតុលាការនេះ ចេញសេចក្តីសម្រេចប្រឆាំង​រូបលោក ពាក់ព័ន្ធបញ្ហាសិទ្ធិទទួលបានសញ្ជាតិពីកំណើត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក ត្រាំ បានបន្តទាត់ចោលច្បាប់ទម្លាប់ តាមរយៈការរិះគន់ក្រុមចៅក្រមតុលារកំពូល ហើយទាមទារភក្តីភាពពីសំណាក់ចៅក្រមទាំងឡាយ ដែលរូបលោកបានតែងតាំងផ្ទាល់។ ក្នុងព្រឹត្តិការណ៍មួយនៅឯសេតវិមាន លោក ត្រាំ បានបង្កើនសម្ពាធឱ្យតុលាការកំពូលគាំទ្រ​លោក ក្នុងការរឹតត្បិតសិទ្ធិជាប្រវត្តិសាស្រ្តនៃការទទួលបានសញ្ជាតិដោយស្វ័យប្រវត្តិ សម្រាប់បុគ្គលនានាដែលកើតនៅលើទឹកដីអាមេរិក។

ដោយគិតថាតុលាការកំពូលអាមេរិក ទំនងនឹងកាត់ក្តីប្រឆាំងរូបលោក លោកប្រធានាធិបតី បាននិយាយថា វានឹងជារឿងដ៏អាម៉ាសមួយ ប្រសិនបើតុលាការសម្រេចយ៉ាងដូច្នោះមែន ខណៈវាជាការសម្រេចចិត្តដ៏ធំមួយ។ លោក ត្រាំ បានចោទថា ចៅក្រមតុលាការកំពូល ហាក់ដូចជាចូលចិត្តកាត់ក្តីប្រឆាំងនឹងចំណាត់ការនានារបស់លោក។

វាមិនទាន់ច្បាស់នោះទេ ថាតើតុលាការកំពូល នឹងប្រកាសសេចក្តីសម្រេចរបស់ខ្លួន ស្តីពីបញ្ហាខាងលើនៅពេលណា ដែលវាគឺជាធាតុស្នូលមួយ នៅក្នុងកិច្ចប្រឹងប្រែងរបស់លោក ត្រាំ ដើម្បីរឹតត្បិតការធ្វើអន្តោប្រវេសន៍ និងបណ្តេញជនអន្តោប្រវេសន៍ខុសច្បាប់។ ក្រុមអ្នកជំទាស់ បានលើកហេតុផលថា រដ្ឋធម្មនុញ្ញរបស់សហរដ្ឋអាមេរិកអនុញ្ញាតយ៉ាងច្បាស់ៗ អំពីសិទ្ធិទទួលបានសញ្ជាតិពីកំណើត ហើយលោក ត្រាំ កំពុងតែ​ប្រព្រឹត្តហួសពីសិទ្ធិអំណាចរបស់ប្រធានាធិបតី។

គួរបញ្ជាក់ថា ចៅក្រមទាំង៩រូបរបស់តុលាការកំពូលអាមេរិក គឺភាគច្រើនជាអ្នកអភិរក្សនិយម ប៉ុន្តែមិនមែនទាំងអស់ សុទ្ធតែបោះឆ្នោត​គាំទ្រគោលនយោបាយរបស់លោក ត្រាំ គ្រប់ពេលនោះទេ៕