(មូស្គូ)៖ នៅក្នុងជំនួបជាមួយឧបនាយករដ្ឋមន្រ្តី និងជារដ្ឋមន្រ្តីការពារជាតិវៀតណាម លោក Phan Van Giang រដ្ឋមន្រ្តីការពារជាតិរុស្ស៉ី លោក Andrey Belousov បានកត់សម្គាល់ពីការផ្តល់អាទិភាព ដល់ការពង្រឹងកិច្ចសហប្រតិបត្តិការយោធាទ្វេភាគី រួមទាំងផ្នែកបច្ចេកទេសយោធារវាងប្រទេសទាំងពីរ។ នេះបើយោងតាមការចេញផ្សាយដោយសារព័ត៌មានរុស្ស៉ី TASS នាថ្ងៃសុក្រ ទី២២ ខែឧសភា ឆ្នាំ២០២៦។

លោក Belousov សង្កត់ធ្ងន់ថា «យើងចាត់ទុកទស្សនកិច្ចផ្លូវការនៃសមភាគីវៀតណាម មកកាន់ប្រទេសរុស្ស៉ី គឺជាផ្នែកសំខាន់មួយនៃដំណើរការជាប់លាប់ និងយូរអង្វែងនៃការអភិវឌ្ឍទំនាក់ទំនងអន្តររដ្ឋ»។

តាមសេចក្តីថ្លែងការណ៍ពីក្រសួងការពារជាតិរុស្ស៉ី ក្នុងជំនួបពិភាក្សានោះ លោក Belousov និង លោក Phan Van Giang ក៏បានផ្លាស់ប្តូរទស្សនគ្នា ជុំវិញការវាយតម្លៃអំពីស្ថានភាពក្នុងតំបន់ និងពិភពលោកផងដែរ៕