(សិង្ហបុរី)៖ ប្រទេសចិនបានផ្អាកការផ្គត់ផ្គង់រ៉ែកម្រ និងវត្ថុធាតុដើមសំខាន់ៗទៅកាន់ប្រទេសជប៉ុន រយៈពេលយ៉ាងហោចណាស់ ៤ខែមកហើយ ដើម្បីប្រើប្រាស់ជាសម្ពាធការទូត ចំពេលដែលប្រទេសទាំងពីរកំពុងមានជម្លោះលើបញ្ហាកោះតៃវ៉ាន់ (Taiwan)។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ជប៉ុនគឺជាអ្នកផលិតមេដែកដែលផ្សំពីរ៉ែកម្រដ៏ធំបំផុតនៅក្រៅប្រទេសចិន ប៉ុន្តែប្រទេសនេះពឹងផ្អែកស្ទើរតែទាំងស្រុងលើការនាំចូលពីចិន សម្រាប់ប្រភេទរ៉ែកម្រដែលប្រើប្រាស់ក្នុងឧស្សាហកម្មផលិតមេដែក វិស័យអាកាសចរណ៍ ការពារជាតិ និងលោហៈធាតុហ្គាលីយ៉ូម (Gallium) ដែលចាំបាច់សម្រាប់ការផលិតបន្ទះឈីប។ ទិន្នន័យគយចិនបានបង្ហាញថា ចាប់តាំងពីខែធ្នូមក ការនាំចេញរ៉ែកម្រដូចជា ឌីស្ប្រូស្យូម (Dysprosium) ធឺប្យូម (Terbium) និងលោហៈហ្គាលីយ៉ូម ទៅកាន់ជប៉ុនត្រូវបានផ្អាកស្ទើរតែទាំងស្រុង ដែលធ្វើឱ្យក្រុមហ៊ុនផលិតមេដែកធំៗរបស់ជប៉ុនដូចជា Shin-Etsu ត្រូវបង្ខំចិត្តផ្អាកការទទួលយកការបញ្ជាទិញថ្មីៗផងដែរ។

គួរបញ្ជាក់ថា វិធានការរឹតត្បិតនេះ មានភាពស្រដៀងគ្នាទៅនឹងការដែលទីក្រុងប៉េកាំងធ្លាប់បានធ្វើដាក់សហរដ្ឋអាមេរិក ក្នុងអំឡុងពេលសង្គ្រាមពាណិជ្ជកម្មកន្លងទៅ។ ជុំវិញវិបត្តិដ៏តានតឹងនេះ រដ្ឋមន្ត្រីក្រសួងពាណិជ្ជកម្មជប៉ុន លោក រីយ៉ូសី អាកាហ្សាវ៉ា (Ryosei Akazawa) បានធ្វើដំណើរទៅដល់ប្រទេសចិនដើម្បីចូលរួមការពិភាក្សានៅថ្ងៃសៅរ៍ចុងសប្តាហ៍នេះ ខណៈដែលរដ្ឋាភិបាលទីក្រុងតូក្យូ កំពុងចាត់វិធានការដោះស្រាយជាបន្ទាន់ ដូចជាការបញ្ចេញប្រេង និងវត្ថុធាតុដើមពីស្តុកបម្រុងដែលចាំបាច់ ដើម្បីទប់ទល់នឹងការកើនឡើងនៃតម្លៃ និងកង្វះខាតការផ្គត់ផ្គង់៕