(ដាកា)៖ ក្រុមបាតុកររាប់ពាន់នាក់នៅក្នុងប្រទេសបង់ក្លាដែស បានផ្ទុះការប៉ះទង្គិចគ្នាយ៉ាងហឹង្សាជាមួយកម្លាំងប៉ូលិស ក្នុងគោលបំណងដណ្ដើមយកខ្លួនជនសង្ស័យម្នាក់ ដែលត្រូវបានចោទប្រកាន់ពីបទរំលោភសេពសន្ថវៈលើកុមារីអាយុ ៤ឆ្នាំម្នាក់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ប៉ូលិសបានឱ្យដឹងថា ជនសង្ស័យឈ្មោះ ម៉ូនីរ ហូសេន (Monir Hossain) ត្រូវបានប្រជាពលរដ្ឋក្នុងទីក្រុងឆាតតូក្រាម (Chattogram) ឃាត់ខ្លួន និងរៀបចំប្រគល់ឱ្យអាជ្ញាធរ កាលពីថ្ងៃព្រហស្បតិ៍ ប៉ុន្តែហ្វូងមនុស្សប្រមាណ ៥,០០០នាក់ បានឡោមព័ទ្ធឡានប៉ូលិសដើម្បីដណ្ដើមយកខ្លួនជនសង្ស័យទៅកាត់ទោសដោយផ្ទាល់ដៃ។ ការប៉ះទង្គិចគ្នាដ៏ស្រួចស្រាវបានអូសបន្លាយពេលជិត ៦ម៉ោង ដោយបាតុករបានដុតបំផ្លាញរថយន្តប៉ូលិសមួយគ្រឿង ខណៈកងកម្លាំងសមត្ថកិច្ចត្រូវបង្ខំចិត្តប្រើប្រាស់ហ្គាសបង្ហូរទឹកភ្នែកដើម្បីគ្រប់គ្រងស្ថានការណ៍។

បាតុកម្មដ៏ហឹង្សានេះ កើតឡើងត្រឹមតែពីរថ្ងៃប៉ុណ្ណោះ បន្ទាប់ពីករណីរំលោភ និងសម្លាប់កុមារីអាយុ ៧ឆ្នាំម្នាក់នៅក្នុងរដ្ឋធានីដាកា បានបង្កការភ្ញាក់ផ្អើលទូទាំងប្រទេស ដែលនាំឱ្យនាយករដ្ឋមន្ត្រី លោក តារីក រ៉ាម៉ាន់ (Tarique Rahman) ចេញមុខសន្យាស្វែងរកយុត្តិធម៌ជាបន្ទាន់។ យោងតាមទិន្នន័យផ្លូវការ ករណីហិង្សាលើស្ត្រី និងកុមារនៅបង់ក្លាដែសបានហក់ឡើងដល់ ២,០១១ករណីក្នុងខែមេសា ខណៈដែលប្រព័ន្ធតុលាការរងការរិះគន់យ៉ាងខ្លាំង ដោយសារតែអត្រាកាត់ទោសឱ្យមានទោសពិតប្រាកដក្នុងសំណុំរឿងបែបនេះមានត្រឹមតែ ៣ភាគរយប៉ុណ្ណោះ ដែលបង្កឱ្យមាននិទណ្ឌភាព និងជំរុញឱ្យពលរដ្ឋផ្ទុះកំហឹងជាបន្តបន្ទាប់៕