(តេអេរ៉ង់)៖ គណៈប្រតិភូចរចារបស់ប្រទេសកាតា បានធ្វើដំណើរទៅដល់ទីក្រុងតេអេរ៉ង់ នៅថ្ងៃសុក្រ ក្រោមកិច្ចសម្របសម្រួលជាមួយសហរដ្ឋអាមេរិក ដើម្បីជួយស្វែងរកកិច្ចព្រមព្រៀងបញ្ចប់សង្គ្រាម និងដោះស្រាយបញ្ហាដែលនៅសេសសល់ជាមួយអ៊ីរ៉ង់។ នេះបើតាមការចេញផ្សាយផ្ដាច់មុខដោយទីភ្នាក់ងារសារព័ត៌មាន Reuters។

កន្លងមក ទីក្រុងដូហាធ្លាប់បានដកខ្លួនមិនចូលរួមសម្របសម្រួលក្នុងសង្គ្រាមអ៊ីរ៉ង់ឡើយ បន្ទាប់ពីរងការវាយប្រហារដោយមីស៊ីល និងដ្រូនរបស់អ៊ីរ៉ង់លើហេដ្ឋារចនាសម្ព័ន្ធស៊ីវិល និងរោងចក្រផលិតហ្គាសធម្មជាតិរាវ (LNG) ដ៏សំខាន់របស់ខ្លួននៅតំបន់រ៉ាសឡាហ្វាន (Ras Laffan)។ ទោះជាយ៉ាងណា ការចូលរួមជាថ្មីរបស់កាតានៅពេលនេះ បានឆ្លុះបញ្ចាំងពីតួនាទីរបស់ខ្លួនក្នុងនាមជាសម្ព័ន្ធមិត្តដ៏ជិតស្និទ្ធរបស់អាមេរិក និងជាបណ្ដាញទាក់ទងសម្ងាត់ដ៏គួរឱ្យទុកចិត្តរវាងទីក្រុងវ៉ាស៊ីនតោន និងទីក្រុងតេហេរ៉ង់ បើទោះបីជាប្រទេសប៉ាគីស្ថាន នៅតែជាអ្នកសម្របសម្រួលផ្លូវការចម្បងក៏ដោយ។

កិច្ចប្រឹងប្រែងនេះធ្វើឡើងចំពេលដែលបទឈប់បាញ់ដ៏ផុយស្រួយកំពុងត្រូវបានអនុវត្ត ប៉ុន្តែការចរចាជួបការលំបាកដោយសារអាមេរិកបន្តបិទខ្ទប់កំពង់ផែអ៊ីរ៉ង់ ហើយអ៊ីរ៉ង់ក៏បន្តបិទច្រកសមុទ្រហ័រមូស។ រដ្ឋមន្ត្រីការបរទេសអាមេរិក លោក ម៉ាកូ រូប៊ីអូ បានបង្ហើបពីវឌ្ឍនភាពវិជ្ជមានខ្លះៗ ប៉ុន្តែលោកបានសង្កត់ធ្ងន់ថា ប៉ាគីស្ថាននៅតែជាដៃគូចម្បងរបស់អាមេរិកក្នុងការចរចានេះ។

គួរបញ្ជាក់ថា កាតាគឺជាសម្ព័ន្ធមិត្តក្រៅណាតូដ៏សំខាន់របស់អាមេរិក និងជាទីតាំងឈរជើងនៃមូលដ្ឋានទ័ពអាកាស អាល់អ៊ូដេដ (Al Udeid) ដែលជាមូលដ្ឋានយោធាដ៏ធំបំផុតរបស់អាមេរិកនៅមជ្ឈិមបូព៌ា៕