(ហ្សឺណែវ)៖ អង្គការសុខភាពពិភពលោក (WHO) នៅថ្ងៃសុក្រ បានសម្រេចដំឡើងកម្រិតហានិភ័យសុខភាពសាធារណៈពីការផ្ទុះឡើងនៃជំងឺអ៊ីបូឡា (Ebola) នៅក្នុងសាធារណរដ្ឋប្រជាធិបតេយ្យកុងហ្គោ (DR Congo) ពីកម្រិត «ខ្ពស់» ទៅជា «ខ្ពស់បំផុត» នៅថ្នាក់ជាតិ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

អគ្គនាយក WHO លោក ថេដ្រូស (Tedros Adhanom Ghebreyesus) បានបញ្ជាក់ថា ជំងឺអេបូឡាប្រភេទ Bundibugyo ដែលមិនទាន់មានវ៉ាក់សាំង ឬវិធីព្យាបាលដែលត្រូវបានអនុម័តជាផ្លូវការនៅឡើយនោះ កំពុងរីករាលដាលយ៉ាងសាហាវ។ បច្ចុប្បន្ន ប្រទេសកុងហ្គោមានករណីសង្ស័យឆ្លងជិត ៧៥០ករណី និងសង្ស័យស្លាប់ ១៧៧នាក់ (ក្នុងនោះមានករណីបញ្ជាក់ជាផ្លូវការចំនួន ៨២ករណី និងស្លាប់ ៧នាក់) ខណៈដែលបញ្ហាអសន្តិសុខ និងអំពើហិង្សាក្នុងស្រុកកំពុងរារាំងដល់កិច្ចប្រឹងប្រែងជួយសង្គ្រោះរបស់បុគ្គលិកសុខាភិបាល។

ក្រៅពីប្រទេសកុងហ្គោ ប្រទេសជិតខាងអ៊ូហ្គង់ដា (Uganda) ក៏បានរកឃើញករណីឆ្លងចំនួន ២ករណី និងស្លាប់ម្នាក់ផងដែរ (ជាអ្នកធ្វើដំណើរមកពីកុងហ្គោ) ប៉ុន្តែស្ថានភាពត្រូវបានគ្រប់គ្រងបានល្អតាមរយៈការស្រាវជ្រាវរកអ្នកប៉ះពាល់ផ្ទាល់។ ទន្ទឹមនឹងនេះ ប្រធានអ្នកវិទ្យាសាស្ត្ររបស់ WHO លោកស្រី ស៊ីលវី ប្រីយ៉ង់ (Sylvie Briand) បានបង្ហើបថា ថ្នាំប្រឆាំងវីរុសសាកល្បងម្យ៉ាងឈ្មោះ Obeldesivir របស់ក្រុមហ៊ុន ជីលីដ សាយអិនស៍ (Gilead Sciences) អាចនឹងត្រូវយកមកប្រើប្រាស់ក្រោមពិធីសារដ៏តឹងរ៉ឹងបំផុត ដើម្បីបង្ការការវិវត្តនៃជំងឺនេះចំពោះអ្នកដែលបានប៉ះពាល់ផ្ទាល់ជាមួយអ្នកជំងឺអេបូឡា៕