(ព្រុចសែល)៖ បណ្ដាប្រទេសសហភាពអឺរ៉ុប (EU) នៅថ្ងៃសុក្រ បានបោះជំហានឆ្ពោះទៅរកការដាក់ទណ្ឌកម្មលើមន្ត្រី និងបុគ្គលពាក់ព័ន្ធរបស់អ៊ីរ៉ង់ ដែលទទួលខុសត្រូវចំពោះការរាំងខ្ទប់ច្រកសមុទ្រហ័រមូស។ នេះបើតាមការចេញផ្សាយដោយ​ទីភ្នាក់ងាសារព័ត៌មាន Reuters។

ដោយចាត់ទុកសកម្មភាពបិទខ្ទប់ច្រកសមុទ្ររបស់ទីក្រុងតេហេរ៉ង់ ថាជាទង្វើ «ផ្ទុយនឹងច្បាប់អន្តរជាតិ» រដ្ឋាភិបាលនៃបណ្ដាប្រទេសសមាជិក EU បានសម្រេចចិត្តពង្រីកវិសាលភាពនៃទណ្ឌកម្មដែលមានស្រាប់របស់ខ្លួន ដើម្បីកំណត់គោលដៅលើបុគ្គល និងអង្គភាពណាដែលបំផ្លាញសេរីភាពនាវាចរណ៍។

ទណ្ឌកម្មថ្មីនេះ នឹងរួមបញ្ចូលទាំងការហាមឃាត់ការធ្វើដំណើរ និងការបង្កកទ្រព្យសម្បត្តិ ខណៈដែលពលរដ្ឋ និងក្រុមហ៊ុនរបស់ EU ទាំងអស់ ក៏ត្រូវបានហាមឃាត់មិនឱ្យផ្តល់មូលនិធិ ឬធ្វើពាណិជ្ជកម្មជាមួយបុគ្គលនៅក្នុងបញ្ជីខ្មៅនេះផងដែរ។

គួររំលឹកថា កន្លងមក វិធានការដាក់ទណ្ឌកម្មរបស់ EU លើប្រទេសអ៊ីរ៉ង់ ធ្លាប់បានផ្តោតលើការគាំទ្រយោធារបស់អ៊ីរ៉ង់ដល់ប្រទេសរុស្ស៊ីក្នុងសង្គ្រាមនៅអ៊ុយក្រែន ការគាំទ្រក្រុមសកម្មប្រយុទ្ធនៅមជ្ឈិមបូព៌ា និងបញ្ហារំលោភសិទ្ធិមនុស្សផ្ទៃក្នុងរបស់អ៊ីរ៉ង់៕