(វ៉ាស៉ីនតោន)៖ កាលពីថ្ងៃសុក្រ ទី២២ ខែឧសភា ឆ្នាំ២០២៦​ ប្រមុខស៉ើបការណ៍របស់សហរដ្ឋអាមេរិក លោកស្រី Tulsi Gabbard បានប្រកាសលាលែងពីតំណែង បន្ទាប់ពីលោកស្រីត្រូវបានគេមើលឃើញថា ហាក់មានការខ្វែងគំនិតគ្នាជាមួយប្រធានាធិបតី លោក ដូណាល់ ត្រាំ ជុំវិញសង្រ្គាមនៅអ៉ីរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោកស្រី Gabbard ដែលមានអាយុ៤៥ឆ្នាំ បាននិយាយថា លោកស្រីសម្រេចលាលែងពីតំណែងនាយកស៉ើបការណ៍សម្ងាត់ ដើម្បីយកពេលមើលថែទាំស្វាមី បន្ទាប់ពីរូបលោកត្រូវបានធ្វើរោគវិនិច្ឆយឃើញមានជំងឺមហារីកឆ្អឹង។ ឆ្លើយតបដំណឹងនេះ លោក ត្រាំ បានស្ងើចសរសើរលោកស្រី Gabbard ថាបំពេញការងារបានល្អ ហើយលោកបានបន្ថែមថា លោកស្រីចង់ជួយស្វាមីឆ្លងកាត់ការតស៊ូជម្នះជំងឺមហារីក ដែលជារឿងត្រឹមត្រូវ។ បើតាមលោកប្រធានាធិបតី នាយករងស៉ើបការណ៍សម្ងាត់ លោក Aaron Lukas នឹងឡើងជានាយកស្តីទី។

លោកស្រី Gabbard គឺជាសមាជិកទី៤នៅក្នុងគណៈរដ្ឋមន្រ្តី ដែលបានចាកចេញពីរដ្ឋបាលរបស់លោក ត្រាំ ក្នុងពេលប៉ុន្មានខែចុងក្រោយនេះ ហើយសុទ្ធតែជា​ស្រ្តី។ លោក ត្រាំ បានបណ្តេញរដ្ឋមន្រ្តីក្រសួងសន្តិសុខមាតុភូមិ លោកស្រី Kristi Noem កាលពីខែមីនា និងរដ្ឋមន្រ្តីក្រសួងយុត្តិធម៌ លោកស្រី Pam Bondi កាលពីខែមេសា។ ចំណែករដ្ឋមន្រ្តីក្រសួងការងារ លោកស្រី Lori Chavez-DeRemer បានចុះចេញពីតំណែង នៅខែមេសា ក្រោយរងអាស្រូវជាបន្តបន្ទាប់។ យ៉ាងណាមិញ សេតវិមាន បានច្រានចោលសេចក្តីរាយការណ៍ ដែលថាលោកស្រី Gabbard ត្រូវបានបង្ខំឱ្យលាលែងពីតួនាទី។

គួរបញ្ជាក់ថា លោកស្រី Gabbard ត្រូវគេរាយការណ៍ថា មិនមានវត្តមានក្នុងបន្ទប់ នៅពេលលោក ត្រាំ ជួបប្រជុំជាមួយក្រុមទីប្រឹក្សាកំពូលៗ ដើម្បីចាប់ផ្តើម​ការវាយប្រហាររួមគ្នាជាមួយអ៉ីស្រាអែល ប្រឆាំងប្រទេសអ៉ីរ៉ង់កាលពីថ្ងៃទី២៨ ខែកុម្ភៈនោះទេ។ ក្រោយសង្រ្គាមចាប់ផ្តើម លោកស្រីបាននិយាយផ្ទុយម្តងហើយម្តងទៀត ឬមិនបានគាំទ្រទាំងស្រុងឡើយចំពោះហេតុផល ដែលរដ្ឋបាលលោក ត្រាំ បានអះអាងជាមូលហេតុនៃការបំផ្ទុះសង្រ្គាម។ លោកស្រី Gabbard បានបដិសេធគាំទ្រ​ការអះអាងរបស់លោក ត្រាំ ដែលថាអ៉ីរ៉ង់បង្កការគំរាមកំហែងបន្ទាន់ចំពោះសហរដ្ឋអាមេរិក ហើយលោកស្រី ក៏បាននិយាយដែរថា យោងតាមការសន្និដ្ឋានរបស់សហគមន៍ស៉ើបការណ៍សម្ងាត់អាមេរិក អ៉ីរ៉ង់មិនបានកំពុងកសាងឡើងវិញនោះទេ នូវសមត្ថភាពចម្រាញ់នុយក្លេអ៊ែរ ដែលត្រូវបានបំផ្លាញដោយសហរដ្ឋអាមេរិកនិងអ៉ីស្រាអែល កាលពីឆ្នាំ២០២៥៕