(វ៉ាស៉ីនតោន)៖ កាលពីថ្ងៃសុក្រ ទី២២ ខែឧសភា ឆ្នាំ២០២៦ ប្រព័ន្ធផ្សព្វផ្សាយអាមេរិក បានរាយការណ៍ថា សហរដ្ឋអាមេរិក កំពុងថ្លឹងថ្លែងអំពីការវាយប្រហារជាថ្មី​លើប្រទេសអ៉ីរ៉ង់ ស្របពេលដែលកិច្ចចរចានៅតែមិនមានភាពរីកចម្រើន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សេចក្តីរាយការណ៍ខាងលើ ដែលចេញមកពី CBS និង Axios គឺកើតមានឡើងត្រឹមប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បាននិយាយថា រូបលោកនឹងមិនបានទៅចូលរួមពិធីមង្គលការកូនប្រុសលោក នាចុងសប្តាហ៍នេះទេ ដោយសារតែកាលៈទេសៈពាក់ព័ន្ធរដ្ឋាភិបាល ហើយនិង​ក្តីស្រឡាញ់របស់លោក ចំពោះសហរដ្ឋអាមេរិក។ លោក ត្រាំ បានបន្ថែមថា «វាជារឿងសំខាន់ដែលរូបខ្ញុំត្រូវស្ថិតនៅក្នុងរដ្ឋធានីវ៉ាស៉ីនតោន... នៅសេតវិមាន អំឡុងពេលដ៏សំខាន់មួយនេះ។ ទោះជាបែបនេះក្តី បើតាម Axios និង CBS ការសម្រេចចិត្តចុងក្រោយស្តីពីការវាយប្រហារថ្មី មិនទាន់ត្រូវបានធ្វើឡើង​នៅឡើយទេ។

ខណៈនេះ ការចរចាត្រូវបានអះអាងថា កំពុងបន្តប្រព្រឹត្តទៅ ដោយប៉ាគីស្ថាន ដែលកំពុងធ្វើជាអ្នកជួយសម្រុះសម្រួលជម្លោះរវាងអាមេរិកនិងអ៉ីរ៉ង់ បានបញ្ជូន​ប្រមុខយោធារបស់ខ្លួនទៅកាន់ទីក្រុងតេហេរ៉ង់ ដើម្បីព្យាយាមជំរុញឱ្យសម្រេចបានកិច្ចព្រមព្រៀង។ ទូរទស្សន៍ CBS បាននិយាយថា អ្នកនាំពាក្យ​​សេតវិមានម្នាក់ លោកស្រី Anna Kelly បានប្រាប់ខ្លួនថា មកទល់ពេលនេះ លោកប្រធានាធិបតី ត្រាំ បានគូសបញ្ជាក់យ៉ាងច្បាស់អំពីផលវិបាក ប្រសិនបើអ៉ីរ៉ង់នៅតែមិនព្រម​ឈានដល់កិច្ចព្រមព្រៀង។

កាលពីថ្ងៃសុក្រ សេតវិមានក៏បានប្រកាសអំពីការប្រែប្រួល ក្នុងគម្រោងចុងសប្តាហ៍របស់លោក ត្រាំ ផងដែរ ដោយនិយាយថា លោកមិននឹងធ្វើដំណើរទៅកាន់ រីសតវាយកូនហ្គោលនៅរដ្ឋ New Jersey ដូចការគ្រោងទុកទេ ប៉ុន្តែជំនួសមកវិញ នឹងស្ថិតនៅក្នុងទីក្រុងវ៉ាស៉ីនតោន។ គេកត់សម្គាល់ឃើញថា ពេលត្រឡប់មកពី​ការធ្វើដំណើរមួយនៅរដ្ឋ New York ជាទីដែលលោកបានថ្លែងសុន្ទរកថាកាលពីថ្ងៃសុក្រ លោក ដូណាល់ ត្រាំ មិនបានទទួលឆ្លើយសំណួរពីក្រុមអ្នកកាសែត ដែលរួមដំណើរ ដូចរាល់ដងឡើយ។

គួរបញ្ជាក់ថា បើតាមសារព័ត៌មាន Axios លោក ត្រាំ បានខកចិត្តកាន់តែខ្លាំងឡើងៗ អំពីវឌ្ឍនភាពនៃកិច្ចចរចាជាមួយអ៉ីរ៉ង់ ជាពិសេសប៉ុន្មានថ្ងៃចុងក្រោយនេះ។ Axios បាននិយាយថា ជំហររបស់លោកអំឡុងសប្តាហ៍នេះ គឺបានផ្លាស់ប្តូរពីការគាំទ្រមធ្យោបាយការទូត ឆ្ពោះទៅរកការបញ្ជាឱ្យវាយប្រហារយោធាសាជាថ្មីវិញ។ រីឯ CBS បានរាយការណ៍ថា ក្រុមមន្រ្តីជាន់ខ្ពស់ផ្នែកយោធានិងស៉ើបការណ៍សម្ងាត់របស់សហរដ្ឋអាមេរិក បាននិងកំពុងលុបចោលផែនការសម្រាកចុងសប្តាហ៍ ដើម្បីត្រៀមខ្លួនសម្រាប់លទ្ធភាពបើកការវាយប្រហារថ្មីលើអ៉ីរ៉ង់៕