(វ៉ាស៉ីនតោន)៖ នាថ្ងៃសៅរ៍ ទី២៣ ខែឧសភា ឆ្នាំ២០២៦ រដ្ឋមន្រ្តីការបរទេសសហរដ្ឋអាមេរិក លោក Marco Rubio បានធ្វើដំណើរទៅដល់ប្រទេសឥណ្ឌា ក្នុងបេសកកម្មមួយ ដើម្បីស្តារភាពជាដៃគូឱ្យប្រសើរឡើងវិញ បន្ទាប់ពីវាបានរងផលប៉ះពាល់ ដោយសារតែចំណាត់ការពន្ធគយរបស់ប្រធានាធិបតីអាមេរិក លោក ដូណាល់ ត្រាំ បូករួមជាមួយការបង្កើនទំនាក់ទំនងរបស់ទីក្រុងវ៉ាស៉ីនតោន ជាមួយគូប្រជែងរបស់ទីក្រុងញូវដែលី គឺប៉ាគីស្ថាននិងចិន។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters។

ក្រសួងការបរទេសអាមេរិក បានឱ្យដឹងថា ដំណើរទស្សនកិច្ចរយៈពេល៤ថ្ងៃ ដែលជាលើកដំបូងរបស់លោក Rubio ទៅកាន់ឥណ្ឌា នឹងប្រព្រឹត្តទៅនៅទីក្រុង​ចំនួន៤ រួមមាន Kolkata, Agra, Jaipur និងរដ្ឋធានីញូវដែលី ហើយកិច្ចពិភាក្សានឹងផ្តោតសំខាន់លើកិច្ចសហប្រតិបត្តិការពាណិជ្ជកម្ម ថាមពល និងការពារជាតិ។ ជាយូរ​ម​កហើយ បណ្តាប្រធានាធិបតីអាមេរិក រួមមានទាំងលោក ត្រាំ កាលពីអាណត្តិទី១ បានព្យាយាមអូសទាញឥណ្ឌាឱ្យមកកៀក ដើម្បីជួយទល់ទល់រុស្ស៉ី និងការកើនឡើងឥទ្ធិពលរបស់ចិន នៅតំបន់ឥណ្ឌូប៉ាស៉ីហ្វិក ប៉ុន្តែកិច្ចប្រឹងប្រែងនោះ បានជួបឧបសគ្គកាលពីឆ្នាំ២០២៥ នៅពេលលោក ត្រាំ សម្រេចដំឡើងពន្ធយ៉ាងខ្ពស់លើឥណ្ឌា។ ពន្ធគយនោះក្រោយមកភាគច្រើនត្រូវបានលុបចោលវិញ ក្នុងកិច្ចព្រមព្រៀងបណ្តោះអាសន្ន ប៉ុន្តែប្រទេសទាំងពីរ មិនទាន់ឈានដល់​កិច្ចព្រមព្រៀងគ្រប់ជ្រុងជ្រោយស្តីពីពាណិជ្ជកម្មនៅឡើយ។

ទីក្រុងញូវដែលីបានព្យាយាមចង់ឱ្យលោក ត្រាំ បំពេញទស្សនកិច្ចទៅកាន់ឥណ្ឌា ដើម្បីចូលរួមកិច្ចប្រជុំកំពូលនៃសម្ព័ន្ធភាព Quad ដែលរួមមានសហរដ្ឋអាមេរិក ឥណ្ឌា ជប៉ុន និងអូស្រ្តាលី ប៉ុន្តែហាក់មិនបានជោគជ័យ ចំពោះមុខភាពបន្តតានតឹងផ្នែកពាណិជ្ជកម្ម និងបញ្ហាមួយចំនួនទៀត ដូចជាការជាប់រវល់របស់អាមេរិក ក្នុងសង្រ្គាមជាមួយអ៉ីរ៉ង់។ កិច្ចប្រជុំរបស់លោក Rubio ជាមួយរដ្ឋមន្រ្តីការបរទេស Quad ដទៃទៀត នៅទីក្រុងញូវដែលី នាសប្តាហ៍ក្រោយ នឹងជាលើកទី៣ហើយ នៃជំនួបក្នុងទម្រង់បែបនេះ ដោយគ្មានការចូលរួមពីមេដឹកនាំ។

ដោយឡែកទន្ទឹមគ្នានោះ សហរដ្ឋអាមេរិក ហាក់បានខិតទៅជិតប៉ាគីស្ថាន ដែលជាគូប្រជែងនិងជាប្រទេសជិតខាងរបស់ឥណ្ឌា ដោយទីក្រុងអ៉ីស្លាម៉ាបាដ បានលេចមុខជាតួអង្គដ៏សំខាន់មួយ ក្នុងកិច្ចប្រឹងប្រែងជួយសម្រុះសម្រួល ដើម្បីបញ្ចប់សង្រ្គាមរវាងអាមេរិកនិងអ៉ីរ៉ង់។ រីឯកាលពីសប្តាហ៍មុន លោក ត្រាំ ទើបតែបានបើកកិច្ចប្រជុំកំពូលជាមួយប្រធានាធិបតីចិន លោក ស៉ី ជីនពីង អំឡុងទស្សនកិច្ចនៅទីក្រុងប៉េកាំង ដែលបានប្រព្រឹត្តទៅដោយភាពកក់ក្តៅ៕