(ប៉េកាំង)៖ មនុស្សយ៉ាងហោចណាស់៨២នាក់ បានបាត់បង់ជីវិត ក្នុងហេតុការណ៍ផ្ទុះអណ្តូងរ៉ែធ្យូងថ្មមួយកន្លែង នៅភាគខាងជើងប្រទេសចិន ហើយមនុស្ស ៩នាក់ផ្សេងទៀត កំពុងបាត់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន Xinhua នាថ្ងៃសៅរ៍ ទី២៣ ខែឧសភា ឆ្នាំ២០២៦។

Xinhua បានរាយការណ៍យ៉ាងដូច្នេះថា «ក្រុមអ្នកយកព័ត៌មានទទួលបានដំណឹងពីកន្លែងកើតហេតុផ្ទាល់ ដែលស្ថិតនៅអណ្តូងរ៉ែធ្យូងថ្ម Liushenyu របស់សម្ព័ន្ធក្រុមហ៊ុន Tongzhou Group ក្នុងខេត្ត Shanxi ថាឧបទ្ទវហេតុនោះ បានផ្តាច់ជីវិតមនុស្ស៨២នាក់»។ ការផ្ទុះឧស្ម័នក្នុងអណ្តូងរ៉ែខាងលើ បានកើតឡើងកាលពីវេលាម៉ោង ៧៖២៩នាទីយប់ថ្ងៃសុក្រ (ម៉ោងក្នុងតំបន់) ខណៈកម្មករសរុប២៤៧នាក់ ត្រូវបានរាយការណ៍ថា កំពុងតែធ្វើការនាពេលនោះ។ ប្រតិបត្តិការជួយសង្រ្គោះ កំពុងបន្តប្រព្រឹត្តទៅនៅកន្លែងកើតហេតុ។

ភ្លាមៗក្រោយកើតមានឧប្បត្តិហេតុផ្ទុះអណ្តូងរ៉ែ ប្រធានាធិបតីចិន លោក ស៉ី ជីនពីង បានដាក់បទបញ្ជាឱ្យប្រឹងប្រែងអស់ពីលទ្ធភាព ដើម្បីព្យាបាលអ្នករងរបួស និងស្វែងរកហើយជួយសង្រ្គោះអ្នកនៅមានជីវិតមាន។ មិនតែប៉ុណ្ណោះ លោក ស៉ី បានបង្គាប់ឱ្យរដ្ឋាភិបាល បើកការស៉ើបអង្កេតមូលហេតុនៃឧបទ្ទវហេតុនេះ និង​ឃាត់ខ្លួនអ្នកដែលទទួលខុសត្រូវ។

គួរបញ្ជាក់ថា កាលពីអំឡុងដើមទសវត្សរ៍ឆ្នាំ២០០០ ឧបទ្ទវហេតុយ៉ាងប្រល័យៗ ធ្លាប់កើតមានឡើងជាញឹកញាប់ នៅក្នុងឧស្សាហកម្មអណ្តូងរ៉ែរបស់ប្រទេសចិន ប៉ុន្តែជាច្រើនឆ្នាំចុងក្រោយមកនេះ ស្តង់ដាសុវត្ថិភាពត្រូវបានរឹតបន្តឹងជាខ្លាំង៕