(ប៉ារីស)៖ ប្រទេសបារាំងបានប្រកាស នាថ្ងៃសៅរ៍ ទី២៣ ខែឧសភា ថាខ្លួនបានហាមរដ្ឋមន្ត្រីសន្តិសុខជាតិអ៉ីស្រាអែល លោក Itamar Ben Gvir មិនឱ្យចូលក្នុងប្រទេស ជុំវិញការបញ្ចេញវីដេអូនៃកាធ្វេីទុក្ខបុកម្នេញលេីក្រុមសកម្មជន បរទេស ដែលទាហានអ៉ីស្រាអែលចាប់បាននៅព្រំដែនហ្កាហ្សា។ នេះបេីយោងតាមការចេញផ្សាយដោយសារទីភ្នាក់ងារសារព័ត៌មាន AFP។

រដ្ឋមន្ត្រីការបរទេសបារាំង លោក Jean-Noel Barrot បានលេីកឡេីងតាមបណ្តាញសង្គម X ថាចាប់ពីថ្ងៃនេះតទៅ លោក Itamar Ben Gvir ត្រូវបានហាមប្រាមមិនឱ្យចូលទឹកដីបារាំង បន្ទាប់ពីសកម្មភាពដ៏គួរឱ្យស្អប់ខ្ពើមរបស់គាត់ចំពោះពលរដ្ឋបារាំង និងអឺរ៉ុបដែលជាផ្នែកមួយនៃក្រុមការងារមនុស្សធម៌។ លោកបន្ថែមថា​ រួមជាមួយប្រទេសអ៉ីតាលី លោកក៏កំពុងអំពាវនាវឱ្យមានការដាក់ទណ្ឌកម្មកម្រិតសហភាពអឺរ៉ុប ប្រឆាំងនឹងរដ្ឋមន្ត្រីស្តាំនិយមរបស់អ៉ីស្រាអែលរូបនេះផងដែរ។

គួរបញ្ជាក់ថា វីដេអូដែលលោក Ben Gvir បានចែកចាយកាលពីថ្ងៃពុធ បង្ហាញពីការប្រព្រឹត្តយ៉ាងធ្ងន់ធ្ងរលើសកម្មជនបរទេសដែលនាំជំនួយចូលហ្កាហ្សាតាមផ្លូវសមុទ្រ។ ពួកគេត្រូវបានឃាត់ខ្លួនដោយអ៉ីស្រាអែលនៅក្នុងដែនទឹកអន្តរជាតិ ហើយកំពុងរង់ចាំការនិរទេសនៅកំពង់ផែភាគខាងត្បូងនៃទីក្រុង Ashdod។

នៅក្នុងវីដេអូនោះ គេឃើញសកម្មជនរាប់សិបនាក់ត្រូវបង្ខំឱ្យលុតជង្គង់ក្រាបដល់ដី ដោយដៃរបស់ពួកគេត្រូវចាប់ចង។ នាយករដ្ឋមន្ត្រីអ៉ីស្រាអែល លោក Benjamin Netanyahu បាននិយាយថា របៀបដែលលោក Ben Gvir បានធ្វេីគឺមិនស្របទៅនឹងតម្លៃ និងបទដ្ឋានរបស់អ៉ីស្រាអែលឡេីយ៕